ÍBV hefur staðfest komu handboltamannsins Sigtryggs Daða Rúnarssonar. Í síðustu viku greindi Vísir frá því að hann væri væntanlega á leið til Eyja.
Sigtryggur skrifaði undir þriggja ára samning við ÍBV. Hann hefur leikið í Þýskalandi allan sinn feril í meistaraflokki, með Aue, Balingen-Weilstetten og síðast Lübeck-Schwartau.
Sigtryggur, sem verður 24 ára í júní, lék fjölda leikja fyrir yngri landslið Íslands og var í U-18 ára liðinu sem vann til bronsverðlauna á HM 2015 í Rússlandi.
Auk Sigtryggs hefur ÍBV fengið Ásgeir Snæ Vignisson frá Val. Sigurbergur Sveinsson er hins vegar hættur.
ÍBV varð bikarmeistari á síðasta tímabili eftir sigur á Stjörnunni í úrslitaleik, 26-24. Eyjamenn voru í 7. sæti Olís-deildarinnar þegar keppni var hætt vegna kórónuveirufaraldursins.
ÍBV komnir/farnir
Komnir:
- Sigtryggur Daði Rúnarsson frá Lübeck-Schwartau (Þýskalandi)
- Ásgeir Snær Vignisson frá Val
Farnir:
- Sigurbergur Sveinsson hættur
- Kristján Örn Kristjánsson til Pays d'Aix (Frakklandi)
