Bó söng í jarðarför og það voru tólf að hlusta

Björgvin Halldórsson tónlistarmaður, söngvari – Bó – skóf ekki af því í viðtali í Bítinu nú í morgun. Og hætti sér inn á jarðsprengjubelti. En nú er að duga eða drepast. Í viðtalinu fór hann yfir stöðuna eins og hún horfir við tónlistarmönnum. Sem er skelfileg. Hann greindi meðal annars frá því að til hafi staðið að hann myndi syngja í nokkrum jarðarförum nú í vor. Það hafi verið ein og það voru 12 viðstaddir.

„Það hefur myndast flöskuháls, allar fermingarnar, allar giftingarnar, og öll þessi hátíðarhöld, það er búið að fresta þessu öllu fram á haust. Ég ætlaði að syngja í nokkrum og fleiri vinir mínir. Ég er búinn að taka eina jarðarför þar sem voru 12 manns. Og allt á að gerast í haust?!“

Vísir hefur greint frá því að hrollur fór um gjörvallan tónlistarbransann þegar Þórólfur Guðnason sóttvarnarlæknir tilkynnti að hin svokallaða tveggja metra regla yrði út árið.

 Sviðslistarmenn sáu sína sæng upp reidda því þetta þýddi það einfaldlega að engir tónleikar né leiksýningar yrðu nema með afar ströngum skilyrðum. Hefðbundnir 1.800 tónleikar í Eldborg færu niður í 200 gesti.

Ekkert uppúr þessu streymi að hafa

„Þetta er ofsalega erfitt. Stórar leiksýningar og stórar sönghátíðir þarfnast gífurlegs undirbúnings. Það er ekki hægt að segja: Það er búið að taka metrana, halda því í næstu viku, það er ekkert hægt. Ungt fólk sem er í tónlist sér ekki fram á að geta haldið tónleika. Og það er ekkert hægt að streyma endalaust. Það er bara ekkert hægt. Bæði sjónvarpsstöðvarnar og listamenn, það er bara ekkert uppúr þessu að hafa. Þetta er lifibrauð.“

Bó telur það vart gerlegt að hólfa salina niður, hann veit ekki hvernig það á að ganga upp:

„Bíddu, á þá Skúli og fjölskylda, sem eru tíu manns sem eru að fara í Hörpuna, og þau vilja hafa metrana, og þá taka þau gott pláss. Svo er er Lúlli vera með sína fjölskyldu. Og þau vilja ekki hafa neina metra. Þau vilja bara sitja saman. Er þetta valkvætt? Eða er þetta skipun? Eða hvað?“

Að mati Björgvins er þetta alls ekki nógu skýrt. Hann tekur skýrt fram að hann virðir það starf Þórólfur og þau í þríeykinu hafa innt af hendi. Og Þórólfur hefur dregið í land með þau ummæli sín að um væri að ræða fyrirskipun um tvo metra, þetta væru tilmæli.

„Já, ég veit það en þá komum við að Lúlla og fjölskyldu sem vill ekki hafa metrana en Siggi vill það.“

Siggi verður bara að sitja heima

Björgvin var spurður hvort það yrði þá ekki svo að vera að Siggi myndi sleppa því að mæta. Bó taldi það einsýnt.

„Já, þessir metrar. Þeir sem vilja þá, þeir sitja þá bara heima. Ég er búinn að vera í hálfgerðri sóttkví í þrjá mánuði. Það er valkvætt. Ég ákvað það bara fyrir mig.“

Að sögn Bós hangir mikið á spýtunni. Sjálfur hefur hann árlega staðið fyrir tónleikaröð fyrir jól, Jólagestir Björgvins,

„Já, mér sýnist að það sé aðeins verið að draga í land sem er gott. En þú heldur ekkert tónleika í Laugardalshöll eða Hörpunni fyrir 300 manns. Það er bara svoleiðis. Hún er nú nógu dýr fyrir skal ég nú bara segja hér fyrir framan alþjóð. Okkar jólagestir eru svo stórir og mikið umfang að það tekur marga mánuði að undirbúa þetta. Svo þarf að markaðssetja þetta, selja þetta, þannig að þetta er voðalega vond staða,“ segir Bó. En segir að hann sé nú þegar byrjaður að undirbúa tónleikana þrátt fyrir allt. Og það er kostnaðarsamt.

Öll ekónómían riðar til falls

„Þetta er nefnilega orðið svo mikið tvíeggja sverð. Við megum vera heppin að búa á litla Íslandi eyju úti á miðju Atlantshafinu miðað við hvað er að koma fyrir löndin úti í heimi. Bretland, England og útum allan heim, þá megum við bara þakka fyrir.

En nú er komið svoleiðis að ef við förum aðeins erlendis, þá segja menn: Við verðum að opna. Annars fer allt á hausinn. Ekónómían fer bara á hausinn, þúsundir fyrirtækja og hérna líka. Hvað á að gera í því?“ spyr söngvarinn.

Bó segist fréttafíkill og hann hafi fylgst grannt með gangi mála í Bandaríkjunum þar sem umræðan er farin að snúast um það að fara að opna fylkin, annars fari þau bara á hausinn. Meðan aðrir vilja ekki opna. En það sé að duga eða drepast.

Víst er að Bó er að tipla á jarðsprengjusvæði, þau sjónarmið sem hann tæpir á eru umdeild. Strax í kynningu á viðtali við hann voru ýmsir á athugasemdakerfinu farnir að láta ljós sitt skína. Einn þar segir, grjótharður við lyklaborðið: „Þá skrifast á tónlistarmenn þegar covid nær sér á strik á ný.“ En, þá er vert að hafa hugfasta varnagla sem Bó slær í viðtalinu:

„Sko, áður en við byrjum á þessu vil ég taka það fram að ég og mínir kollegar, tónlistarmenn og sviðslistamenn og leikhúsfólks, gerum okkur fulla grein fyrir alvarleika málsins. Erkifjandi sem enginn veit hvaðan kom og enginn veit hvað er.“