Viggó og félagar á góðu skriði

Viggó Kristjánsson og félagar í Wetzlar báru sigurorð af Ludwigshafen, 26-23, í þýsku úrvalsdeildinni í handbolta í kvöld.

Wetzlar hefur unnið tvo leiki í röð og þrjá af síðustu fjórum leikjum sínum. Liðið er í 9. sæti deildarinnar.

Viggó skoraði tvö mörk fyrir Wetzlar sem hefur gengið vel eftir að Seltirningurinn gekk í raðir liðsins.

Strákarnir hans Geirs Sveinssonar í Nordhorn-Lingen töpuðu fyrir Magdeburg, 21-27.

Nordhorn er í átjánda og neðsta sæti deildarinnar með tvö stig, tíu stigum frá öruggu sæti.

Kiel tyllti sér topp deildarinnar með sigri á Göppingen, 26-27. Gísli Þorgeir Kristjánsson er enn frá vegna meiðsla hjá Kiel.

Þá vann Füchse Berlin nauman sigur á Leipzig, 29-28.