Hlýindi og rigning taka við á morgun

Í dag er útlit fyrir slyddu- eða snjóél víða á landinu en horfur eru á þurru veðri um landið suðaustan- og austanvert. Allvíða verður frostlaust með ströndinni, en frost inn til landsins. Þá má búast við vestlægri átt á landinu, víða á bilinu 5-10 m/s, að því er fram kemur í hugleiðingum veðurfræðings á vef Veðurstofu Íslands.

Á morgun bætir í vind úr suðri, það hlýnar og fer að rigna. Strekkingur verður víða „en á stöku stað nær sunnanáttin sér betur á strik og má til dæmis búast við hvassviðri á norðanverðu Snæfellsnesi seinnipartinn,“ segir í hugleiðingum veðurfræðings.

Þurrt verður norðaustan- og austanlands og hitinn undir frostmarki fram eftir degi, „enda styrkur sunnanáttarinnar á þeim slóðum ekki nægur til að blása kalda loftinu burt sem þar liggur fyrir.“

Á mánudag er svo útlit fyrir áframhaldandi sunnanátt með vætu og hlýnar enn frekar á landinu.

Veðurhorfur á landinu næstu daga

Á sunnudag:

Gengur í sunnan 8-15 m/s með rigningu, en hvassara á norðanverðu Snæfellsnesi. Hægari vindur norðaustan- og austanlands og þurrt að kalla. Hlýnar í veðri, hiti 4 til 8 stig undir kvöld, en kringum frostmark norðaustantil.

Á mánudag:

Sunnan og suðvestan 10-18 með rigningu og súld, en úrkomulítið á Austurlandi. Hiti 6 til 12 stig.

Á þriðjudag:

Suðlæg átt og víða rigning eða slydda. Vestlægari seinnipartinn á vestanverðu landinu með éljum og kólnar.

Á miðvikudag:

Hvöss suðvestan- og vestanátt með éljagangi, en bjartviðri á austanverðu landinu. Hiti um og undir frostmarki.

Á fimmtudag:

Vestlæg eða breytileg átt og dálítil él, en rigning eða slydda syðst á landinu og áfram bjart austanlands. Hiti kringum frostmark.

Á föstudag:

Útlit fyrir norðanátt með snjókomu eða éljum, en léttir til sunnanlands síðdegis. Hiti rétt undir frostmarki.