Draumabyrjun Söru bjó til ævintýraferð og frí í febrúar

Sara Sigmundsdóttir mun ekki keppa á Reykjavik CrossFit Championship í aprílmánuði því íslenska CrossFit stjarnan ætlar bara að keppa á tveimur mótum til viðbótar fram að heimsleikunum í ágúst.

Sara Sigmundsdóttir hefur byrjað nýtt keppnistímabil í CrossFit frábærlega með því að vinna „The Open“ og fylgja því síðan eftir með því að vinna CrossFit Filthy 150 mótið á Írlandi. Sara hefur með þessu unnið sér nokkra farseðla á heimsleikana næsta haust og getur því sett upp mánuðina fram að heimsleikunum eftir eigin hentisemi.

Sara er kominn til Dúbæ þar sem hún mun keppa á Dubai CrossFit Championship um miðjan desembermánuð. Þar getur hún fylgt eftir frábærri byrjun sinni.

Sara er vinsæll og skemmtilegur viðmælandi í CrossFit heiminum enda fáir sem gefa jafnmikið af sér í viðtölum og hún. Sara er hreinskilnin uppmáluð og það gerir viðtölin við hana afarinnileg og skemmtileg.

Sara greindi frá framtíðarplönum sínum í viðtölum eftir sigra sína í „The Open“ og á CrossFit Filthy 150 mótinu. Hún gerði meira en það því hún auglýsti líka eftir hugmyndum af mögulegum ferðastöðvum fyrir hana í febrúar.

Eftir þessa draumabyrjun á 2020 tímabilinu hefur Sara nefnilega náð að búa sér til frí í febrúar og það ætlar hún að nýta til að fara í ævintýraferð.

Sara ræddi aðeins þetta komandi frí sitt í viðtalinu við ritstjóra Morning Chalk Up.

„Eftir mótið í Dúbæ þá ætla ég að keppa á Rogue Invitational mótinu og svo eru það bara heimsleikarnir,“ sagði Sara sem þýðir að hún mun ekki keppa á Reykjavik CrossFit Championship mótinu í apríl.

Sara segist ætla að taka smá frí í febrúar en frí hjá henni er samt ekkert frí. Sara segist þó ætla að leyfa sér að slaka aðeins á æfingaálaginu í öðrum mánuði ársins og leyfa sér að fara í ævintýraferð.

„Ég ætla að fara í tveggja vikna frí og ferðast eitthvað. Ég ætla að fara á einhvern frábæran stað. Mælir þú með einhverjum stað,“ spurði Sara spyrilinn Justin LoFranco.

Evrópa var strax úr leik. „Ég vil sól og strendur. Ég hef farið til Balí,“ sagði Sara sem vil prófa eitthvað nýtt í þessari ferð sinni.

Áður en Justin LoFranco áttaði sig á því þá var Sara búin að breyta viðtalinu í létt kaffihúsaspjall þar sem hún spurði hann á móti. Hann reyndi þó að komast aftur á strik á ný.

Sara nefndi einnig febrúarfríð sitt í viðtali strax eftir sigurinn á CrossFit Filthy 150 mótinu en það má sjá það viðtal hér fyrir neðan en þar fer Sara líka aðeins yfir þessa draumabyrjun sína á tímabilinu.