Skuldar spilavíti 62 milljónir króna

Íshokkí-leikmaðurinn Evander Kane hjá San Jose Sharks í NHL-deildinni fékk lánaðar tugi milljóna hjá spilavíti í Las Vegas á meðan hann var að spila þar í úrslitakeppni NHL-deildarinnar.

Kane mætti á Cosmopolitan-hótelið til þess að drepa tímann milli leikja í úrslitakeppninni og fékk uppáskrifað að hann mætti veðja fyrir 62 milljónir króna.

Það gerði hann, vann ekki neitt og fór svo heim. Kane sá svo aldrei ástæðu til þess að greiða skuldina. Cosmopolitan hefur því þurft að fara í mál við hann til að fá peninga til baka.

Hinn 28 ára gamli Kane gerði fyrir rúmu ári síðan sjö ára samning við Sharks sem mun færa honum rúma sex milljarða króna í vasann. Hann ætti því að eiga fyrir skuldinni.