Undanþága vegna Torgs og Hringbrautar

Samkeppniseftirlitið hefur samþykkt undanþágu á samkeppnislögum vegna yfirtöku Torgs, sem á og rekur meðal annars Fréttablaðið, á sjónvarpsstöðinni Hringbraut.

Samkeppniseftirlitinu er heimilt samkvæmt 4. mgr. 17. greinar samkeppnislaga að veita undanþágu frá banni samkeppnislaga við því að samruni komi til framkvæmda á meðan eftirlitið fjallar um hann. Er þar vísað til þess að félagið þurfi á auknum fjármunum að halda til að styrkja reksturinn. Undanþága þessi er þó háð þeim skilyrðum að ekki verði aðhafst nokkuð í rekstri Hringbrautar á undanþágutíma, sem mögulegt sé að vinda ofan af, verði ekki af samruna félaganna.