Bjóða far­þegum upp á að kol­efnis­jafna flugið

Farþegar Icelandair og Air Iceland Connect geta nú kolefnisjafnað flug sitt þegar verið að er að panta miða. Þetta kemur fram í tilkynningu frá Icelandair Group.

Hjá Icelandair verði um að ræða sérstaka þjónustusíðu þar sem farþegar geti greitt viðbótarframlag til að jafna kolefnisfótspor sitt, en hjá Air Iceland Connect verði hægt að velja kolefnisjöfnun sem viðbótarþjónustu við bókun flugmiða. Viðskiptavinum Icelandair Cargo verður sömuleiðis gefinn möguleiki á að kolefnisjafna flutninginn.

Sem dæmi má nefna að samkvæmt reiknivélinni á vef flugfélagsins myndi það kosta 673 krónur að kolefnisjafna flug frá Keflavík og til Kaupmannahafnar, og aftur til baka. Flug til og frá New York myndi kosta 1.305 krónur að kolefnisjafna.

Félagið hefur í samstarfi við Klappir grænar lausnir reiknað út hversu mikið af gróðurhúsalofttegundum losna við flug til allra áfangastaða félaganna, en framlagið mun renna til Kolviðar sem hefur umsjón með kolefnisjöfnuninni. Felst hún í að binda kolefni í gróðri og jarðvegi.

Kolviður er kolefnisjóður sem var stofnaður af Skógræktarfélagi Íslands og Landvernd og er markmið sjóðsins að auka bindingu kolefnis í jarðvegi með þeim tilgangi að draga úr styrk koldíoxíðs (CO2) í andrúmslofti.