Ástralski há­skóla­kennarinn sagður hafa verið yfir ár í ein­angrunar­vist

Háskólakennarinn Kylie Moore-Gilbert er þriðji Ástralinn sem situr í Evin-fangelsinu í Tehran í Íran. Gilbert er sögð hafa verið fangelsuð sumarið 2018 og hafi verið látin sæta einangrunarvist síðan þá. Í frétt BBC er Gilbert sögð eiga yfir höfði sér tíu ára fangelsisvist.

Áður höfðu þau Jolie King og Mark Firkin, ástralskt par sem hefur notið mikilla vinsælda sem ferðabloggarar á samfélagsmiðlum, verið nafngreind sem fangar í fangelsinu. Voru þau handtekinn á ferðalagi í byrjun júní. Haft var eftir fréttamanni persnesku sjónvarpsstöðvarinnar Manoto TV að parið hafði verið handtekið í grennd við Tehran fyrir að fljúga dróna.

Sjá einnig: Ferðabloggararnir sem handteknir voru fyrir drónaflug í Íran nafngreindir

Fangelsið hefur um árabil verið þekkt fyrir að hýsa pólitíska fanga og hafa stjórnendur fangelsisins ítrekað verið sakaðir um að fremja alvarleg mannréttindabrot í garð fólksins sem þar er í haldi.

Gilbert er sérfræðingur í málefnum Mið-Austurlanda og kennir við háskólann í Melbourne. Ekki er vitað fyrir hvaða sakir hún var fangelsuð en að sögn Times eru tíu ára fangelsisdómar alla jafna gefnir fyrir njósnir.

Í yfirlýsingu frá fjölskyldu Gilbert segjast þau treysta á diplómatískar leiðir til þess að fá Gilbert úr fangelsinu og aftur heim til Ástralíu.

Hér að neðan má sjá viðtal við Gilbert frá árinu 2017.