Villtist tvisvar áður en útkallið barst

Björgunarsveitir á Suðurlandi voru kallaðar út snemma á fimmta tímanum í dag vegna göngumanns sem hafði villst við Útigönguhöfða í Þórsmörk neðan við Morrinsheiði. Þetta kemur fram í tilkynningu frá Landsbjörg.

Maðurinn lagði af stað í gönguferð frá Básum fyrr í dag og ætlaði að ganga að Útigönguhöfða, þaðan upp á heiðina og niður gönguleiðina af Fimmvörðuhálsi. Í tilkynningu segir að sá hluti af leiðinni sé nokkuð fáfarin og göngustígurinn því ógreinilegur á köflum. Maðurinn hafi enda villst í tvígang áður en útkallið barst.

Björgunarsveitamaður sem var staddur í Básum lagði af stað í átt að manninum og aðrir komu akandi í Þórsmörk. Illa gekk að ná sambandi við manninn til að reyna að staðsetja hann nánar, að því er fram kemur í tilkynningu. 

Rétt upp úr klukkan fimm mættust göngumaðurinn og björgunarsveitarmaðurinn á Kattarhryggjum. Þá hafði göngumaðurinn fundið göngustíginn og var á leiðinni niður í Þórsmörk, þar sem samferðafólk hans beið. Á sjötta tímanum var hann því á leiðinni í Bása í fylgd björgunarsveitarmannsins.