Hættir hjá Arion banka

Jónína S. Lárusdóttir framkvæmdastjóri lögfræðisviðs Arion banka hefur ákveðið að hætta störfum hjá bankanum. Svo segir í tilkynningu frá bankanum.

Jónína hefur verið framkvæmdastjóri lögfræðisviðs og setið í framkvæmdastjórn bankans í um níu ár eða frá nóvember 2010. Hún mun láta af störfum föstudaginn 13. september næstkomandi.

„Það hefur verið mikill fengur fyrir Arion banka að hafa notið reynslu og þekkingar Jónínu síðastliðin níu ár. Ég vil þakka henni góð störf í þágu bankans og óska henni velfarnaðar í framtíðinni,“ segir Benedikt Gíslason, bankastjóri Arion banka.