Hagnaður sjóða fimmfaldaðist milli ára

Hagnaður Íslandssjóða hf. nam 262 milljónum króna á fyrstu sex mánuðum ársins. Allir sjóðir Íslandssjóða skiluðu jákvæðri ávöxtun á tímabilinu og nam ávöxtun sjóðanna alls 8.010 milljónum króna sem renna til viðskiptavina félagsins, segir í tilkynningu frá sjóðnum. 28,9% aukning varð á tekjum á milli ára.

Nú starfar hjá félaginu 21 sérfræðingur í eignastýringu, tíu konur og ellefu karlar. Alls voru eignir í stýringu hjá Íslandssjóðum 298 milljarðar króna í lok tímabilsins. Íslandssjóðir hf. er elsta sjóðastýringarfyrirtæki landsins, stofnað árið 1994 og er dótturfélag Íslandsbanka.

„Rekstur Íslandssjóða er áfram sterkur og góð ávöxtun sjóða og eignasafna hefur skilað sér til viðskiptavina okkar á þessu ári. Mikill meðbyr hefur skilað Íslandssjóðum aukinni markaðshlutdeild á sjóðamarkaði og nýjum sjóðum hefur verið sérstaklega vel tekið af sparifjáreigendum. Ber þar helst að nefna Græn skuldabréf en mikil áhersla er lögð á ábyrgar fjárfestingar hjá Íslandssjóðum og horfum við þar sérstaklega til umhverfis- og loftslagsmála,“ segir Kjartan Smári Höskuldsson, framkvæmdastjóri Íslandssjóða, í tilkynningu.