Ísland á fimm keppendur í kvennaflokki á heimsleikunum í ár þar af hafa tvær þeirra unnið heimsleikana tvisvar sinnum hvor og sú þriðja hefur komist tvisvar á verðlaunapallinn.
Við erum auðvitað að tala um þær Anníe Mist Þórisdóttur, Katrínu Tönju Davíðsdóttur og Ragnheiði Söru Sigmundsdóttur. Þær hafa alltaf verið í toppbaráttunni á sínum heimsleikum til þessa og eru þrjár af stærstu stjörnum CrossFit í dag.
Þuríður Erla Helgadóttir er líka orðinn reynslubolti á heimsleikunum því þetta verða hennar fimmtu leikar í einstaklingskeppninni. Þuríður Erla hefur hækkað sig á hverjum heimsleikum og náði átjánda sætinu þegar hún keppti síðast árið 2017. Fimmti íslenski keppandinn er síðan Oddrún Eik Gylfadóttir sem keppti líka í fyrra og varð þá í 26. sæti.
Ísland átti því fjóra keppendur meðal þeirra 26 efstu í kvennakeppninni í fyrra en bestum árangri náði Katrín Tanja Davíðsdóttir með því að ná þriðja sætinu. Anníe Mist Þórisdóttir varð í fimmta sæti en Sara Sigmundsdóttir varð því miður að hætta vegna meiðsla.
Það er vonandi að íslensku stelpunum takist vel upp á leikunum í ár en Anníe, Katrín og Sara eru alltaf í umræðunni þegar spekingar fara að spá um hverjar muni berjast um sigurinn.
Tia-Clair Toomey vann heimsleikana í fyrra en með henni og Katrínu Tönju á verðlaunapallinum var hin ungverska Laura Horvath. Kara Saunders var síðan á milli Katrínar og Anníe Mist. Tia-Clair Toomey var að vinna annað árið í röð en hún hefur verið í efstu tveimur sætunum fjögur ár í röð.
Hér fyrir neðan má sjá upprifjun CrossFit samtakanna á lokadeginum í fyrra en þar má meðal annars sjá tilfinningaríka Katrínu Tönju eftir að keppninni lauk.
