Allt að 20 stiga hiti og hellidembur

Framan af morgni má búast við hægum vindum og víða þokulofti en rofar síðan til. Smá skúrir á víð og dreif eftir hádegi, en líkur á hellidembum inn til landsins þegar líður á daginn, einkum þó á Norðausturlandi. Þetta kemur fram í hugleiðingum veðurfræðings á vef Veðurstofu Íslands.

Í nótt nálgast dálítil úrkomusvæði sunnan úr hafi og þokast yfir landið. Má því búast við vætu víða um land á morgun, einkum þó sunnan- og vestantil.

Fremur hlýtt í veðri um helgina og getur hiti náð 20 stigum norðaustantil í dag.

Veðurhorfur á landinu

Hæg breytileg átt, en suðvestan 5-10 m/s við SA-ströndina síðdegis. Skýjað að mestu og víða smáskúrir, en þokubakkar úti við N -og A-ströndina. Líkur á skúradembum inn til landsins seinni partinn, einkum NA-lands. Hiti 12 til 20 stig, hlýjast NA-til.

Suðaustan 3-10 og dálítil rigning eða súld S- og V-lands í nótt og á morgun, en annars hægara, skúrir og heldur svalara.

Veðurhorfur á landinu næstu daga

Á sunnudag:

Hæg suðlæg eða breytileg átt og skýjað, skúrir á víð og dreif, en suðaustan 5-10 m/s og fer að rigna á S- og V-landi undir kvöld. Hiti 10 til 18 stig, hlýjast inn til landsins. 

Á mánudag:

Sunnan og suðaustan 3-10 m/s og rigning með köflum, úrkomumest V-lands. Hiti 14 til 22 stig, hlýjast A-til. 

Á þriðjudag og miðvikudag:

Austlæg átt og dálítil væta með köflum. Hiti 12 til 20 stig, hlýjast á V-landi. 

Á fimmtudag og föstudag:

Útlit fyrir norðaustlæga átt, skýjað með köflum, en þurrt að kalla og áfram hlýtt í veðri.