Börnin ekki í bílstólum og ökumaðurinn með útrunnið skírteini

Lögreglan á Suðurnesjum hafði í gær afskipti af ökumanni sem var með tvö börn í bifreið sinni og voru þau ekki í bílstólum. Ökumaðurinn var einnig með útrunnið ökuskírteini, að því er fram kemur í tilkynningu frá lögreglunni á Suðurnesjum.

Annar ökumaður á fertugsaldri, sem mældist á 104 kílómetra hraða þar sem hámarkshraði er 70, reyndist aldrei hafa öðlast ökuréttindi. Nokkrir til viðbótar voru kærðir fyrir hraðakstur, þar á meðal einn sem mældist á 139 kílómetra hraða þar sem hámarkshraði er 90. Hann gaf þá skýringu að hann hefði verið að flýta sér því hann væri að missa af flugi.

Þá voru fáeinir teknir úr umferð vegna gruns um akstur undir áhrifum vímuefna. Einn þeirra ók sviptur ökuréttindum.