Hræddur um að Indigo hafi fyrst og fremst ætlað sér að "þefa“ af WOW air

Jón Karl Ólafsson, fyrrverandi framkvæmdastjóri hjá Isavia og fyrrverandi forstjóri Icelandair, er ekki viss um að Indigo Partners hafi með viðræðum við WOW air ætlað sér að kaupa flugfélagið.

„Þessir samningar við Indigo hafa verið mjög sérstakir. Yfirleitt þegar menn eru að kaupa fyrirtæki þá drífa þeir sig í að ganga frá þeim samningum eins hratt og hægt er til þess að fyrirtæki geti haldið áfram rekstri. Þessar tafir, mánuð eftir mánuð, eru búnar að vera mjög merkilegar að horfa á,“ sagði Jón Karl á Sprengisandi á Bylgjunni í morgun þar sem hann ræddi stöðu WOW Air ásamt Magnúsi Árna Skúlasyni hagfræðingi.

Bandaríska félagið Indigo Partners hóf viðræður um aðkomu þess að WOW air í nóvember. Félagið er stofnað af Bill Franke og sérhæfir það sig í fjárfestingu í flugiðnaði. Félagið er stærsti hluthafinn í Wizz Air, sem meðal annars flýgur til og frá Íslandi. Þá á félagið einnig aðalfjárfestirinn í Tiger Airways og Spirit Airlines.

Farnir með flugtímana á Gatwick

Viðræðurnar stóðu yfir mánuðum saman en í fyrstu var útlit fyrir að samningar myndu nást. Tilkynnt var um að Indigo myndi koma með allt að 9,3 milljarða inn í WOW air og skömmu síðar var tilkynnt að félagið myndi eignast 49 prósenta hlut í WOW air.

Sjá einnig: Hefur ekki trú á því að Icelandair kaupi WOW air

Viðræðurnar drógust þó á langinn en í lok febrúar var tilkynnt um að viðræður héldu áfram. Síðastliðinn fimmtudag var hins vegar tilkynnt að Indigo hefði slitið viðræðunum. Var Jón Karl spurður að því á Sprengisandi hvort að hann teldi að Indigo hafi aldrei ætlað sér að kaupa WOW air.

„Ég er hræddur um að þeir hafi fyrst og fremst ætlað sér að þefa af þessu og læra. Þeir náðu slottunum á Gatwick og það er ýmislegt sem bendir til þess að þeir hafi nú fengið margt af því sem þeir ætluðu sér í þessum samningi,“ sagði Jón Karl.

Og séu nú bara farnir með það?

„Þeir eru farnir með það. Þeir fóru með slottin að minnsta kosti, á Gatwick. Ég þekki ekki nákvæmlega hvernig þetta var en þetta er að minnsta kosti mjög merkilegt. Ef þú kaupir fyrirtæki þá er yfirleitt fyrsta reglan að þú reynir að gera það hratt til þess að fyrirtækið haldi þá áfram í rekstri ef það er markmiðið yfir höfuð,“ sagði Jón Karl og vísaði til þess að Wizz air, eitt af félögunum í eigu Indigo, hafi verið annað tveggja flugfélaga sem keypti flugtíma WOW air á Gatwick-flugvelli í Bretlandi.

Viðræður standa nú yfir á milli Icelandair og WOW air um aðkomu fyrrnefnda félagsins að rekstri WOW air. Gáfu félögin sér frest til morgundagsins til þess að ljúka viðræðum.

Hlusta má á viðtalið við Jón Karl og Magnús Árna hér fyrir neðan.