Mótmæla lokunum á Laugavegi: „Við viljum náttúrulega fá Íslendinga í miðbæinn“

Bolli Ófeigsson, gullsmiður hjá Gullsmiðju Ófeigs, segir almenna óánægju á meðal verslunarfólks á Laugavegi, Bankastræti og Skólavörðustíg með þá ákvörðun Reykjavíkurborgar að loka til frambúðar Laugavegi frá Vatnsstíg að Bankastræti og neðri hluta Skólavörðustígs fyrir bílaumferð.

Meirihluti rekstraraðila í götunum þremur hefur ritað nafn sitt á undirskriftalista þar sem lokuninni er mótmælt. Þann 1. maí næstkomandi verður lokað fyrir bílaumferð en ekki er um sumarlokun að ræða heldur verður lokað til frambúðar.

Miðbæjarfélagið boðaði til blaðamannafundar í dag þar sem undirskriftasöfnunin var kynnt. Þar kom fram að alls hefðu 239 rekstraraðilar skrifað nafn sitt á listann.

Á Laugavegi og Bankastræti náðist ekki í 22 aðila eða þeir svöruðu ekki, fimm lýstu sig hlynnta lokuninni og sjö vildu ekki lýsa afstöðu sinni opinberlega. Á Skólavörðustíg náðist ekki í níu aðila. Þrír lýstu sig hlynnta lokun og tveir vildu ekki taka afstöðu opinberlega.

95 prósent túristar og fimm prósent Íslendingar

Aðspurður hvers vegna verslunareigendur vilji ekki lokanir segir Bolli að þeir vilji greiða leið inn í miðbæinn.

„Við viljum fá sem flesta í bæinn og við viljum náttúrulega fá Íslendinga í miðbæinn. Þeir eru hættir að koma meira og minna en þetta sem miðbær Íslendinga, miðbær Íslands og við viljum fá okkar fólk í bæinn og við viljum að reksturinn geti lifað hérna,“ segir Bolli.  

Hann segir að í dag séu 95 prósent hans viðskiptavina túristar og aðeins fimm prósent Íslendingar. Fyrir nokkrum árum var það akkúrat. Spurður hvort þessi breyting sé ekki vegna fjölgunar ferðamanna svarar Bolli neitandi og bendir á að um sé að ræða sömu sölu þegar kemur að krónutölu.

„Það er engin aukning í verslun heldur er hún að dragast saman í minni búð,“ segir Bolli.

Segir erfitt að komast í bæinn jafnvel með strætó

Hann kveðst telja að það hafi sirka tíu verslanir á ári lokað á Skólavörðustígnum og sama svarið komi alltaf; menn kenna lokununum um.

Þá segist Bolli ekki sammála því að um sé að þræða þróun sem á sér stað um allan heim, það er að leyfa ekki bílaumferð inni í miðborginni.

„Ég er nú ekki sammála því. Þar sem ég hef ferðast víða í Evrópu þar eru alls staðar bílar, í þrengstu götum, það er alls staðar pláss fyrir bíla. Það eru einstaka borgir sem geta leyft sér að hafa göngugötur en þar eru lestar, underground, strætó, allt miklu betra. Það er erfitt að komast í bæinn, meira að segja í strætó.“

Bolli segir verslunareigendur stressaða vegna lokananna og þeim þyki þetta leiðinlegt.

„Við hefðum haldið það að borgaryfirvöld ættu að þjónusta borgarana en ekki drottna yfir okkur.“

Skoða að loka fyrir umferð alveg upp að Hlemmi

Sigurborg Ósk Haraldsdóttir, formaður skipulags- og samgönguráðs, segir í samtali við Vísi að næstu skref varðandi lokanir séu að skipta Laugaveginum upp í búta eða svæði þar sem ætlunin sé að endurhanna og endurgera Laugaveginn og gera hann að göngugötu.  

„Þessar framkvæmdir munu ekki allar eiga sér stað í einu heldur munum við gera þetta í áföngum og þá mun göngugötusvæðið stækka samhliða þessum framkvæmdum,“ segir Sigurborg.

Sigurborg segir ekki endanlega lendingu komna í það hversu langt göngugötusvæðið mun ná en að það verði kynnt á næstu dögum.

„En við erum að skoða alveg frá Lækjargötu og upp að Hlemm,“ segir hún.

Sigurborg segir að þetta sé einnig hugsað til frambúðar. Ekki standi svo til að loka Skólavörðustíg frekar fyrir bílaumferð nema þá neðsta hluta hans. Sigurborg segir það aldrei hafa verið til skoðunar.

Helsti styrkur Laugavegs staðsetningin og upplifunin

En hverju svara borgaryfirvöld því að verslanir leggi upp laupana í miðbænum vegna þess að bílar mega ekki keyra þar?

„Stóra myndin er sú að miðborgin er að stækka og breytast og Laugavegurinn með. Samfélagið okkar er annað í dag, verslun er öðruvísi í dag en fyrir nokkrum árum og verslun á Laugavegi er til dæmis líka að keppa í netverslun. En helsti styrkur Laugavegs er að sjálfsögðu staðsetningin og upplifunin. Það er margt á hreyfingu í borginni og verslanir hreyfast og færast eftir því hvar markhópur þeirra er. En hvað varðar Laugaveginn og göngugötur þá vitum við líka í borgum í kringum okkur þá eykst verslun þegar göngugötur opna,“ segir Sigurborg.

Liggja fyrir tölfræðileg gögn hjá borginni sem styðja það að verslun geti aukist með þessu eða í hina áttina að hún sé að dragast saman?

„Við erum ekki að rýna gögnin hjá verslunareigendum en við getum skoðað opinber gögn sem eru til dæmis gögn sem við höfum um verslunarkjarna og verslunarmiðstöðvum á höfuðborgarsvæðinu og samanburð við göngugötur þá sjáum við að opnun göngugatna er ekki að hafa neikvæð áhrif. Það er eina sem er svona beintengt þessum verslunum en svo vinnum við náttúrulega út frá þekktum fræðum eins og skipulagsfræðum og borgarhagfræði,“ segir Sigurborg.