Álftin kastaði kveðju á hreindýrin og útskrifaði sig sjálf

Frægasta álft landsins, sú sem festi gogg sinn í Red Bull dós á dögunum, yfirgaf Fjölskyldu- og húsdýragarðinn í Laugardal í morgun. Hún útskrifaði sig sjálf eins og fram kemur í færslu garðsins á Facebook.

Álftin komst í fréttirnar í vikunni þegar íbúar í Garðabæ vöktu athygli á þrekaðri álftinni með dósina fasta á goggnum. Starfsmenn Nátturufræðistofnunar og Garðabæjar komu henni svo til aðstoðar á mánudag, klipptu dósina af goggnum og fluttu hana í Laugardalinn.

Í morgun slapp hún útaf sjúkradeildinni, heilsaði upp á hreindýrin og tók svo flugið út í náttúruna þar sem hún á vonandi langt líf fyrir höndum, að því er segir í færslu garðsins.