Kvöldfréttir Stöðvar 2 í beinni útsendingu

Uppfært: Bilun kom upp í myndstjórn og unnið er að viðgerð.



Þekktir og valdamiklir menn eru meðal vændiskaupenda í Reykjavík að sögn íslenskrar vændiskonu sem seldi aðgang að líkama sínum þar til fyrir tveimur árum. Tugir og jafnvel hundruð karlmenn keyptu af henni vændi. Hana langar að kæra mennina en getur það ekki því brotin eru fyrnd. Hún segir sárt að geta ekki skilað skömminni. Við ræðum við konuna í kvöldfréttum Stöðvar 2 klukkan hálf sjö.

Við ræðum einnig við verkefnastjóra hjá Bjarkarhlíð, miðstöð fyrir þolendur ofbeldis. Hún segir hátt í fimmtán konur leita árlega til þeirra vegna vændis. Hún óttast að væg refsing kaupenda hafi mjög takmarkaðan fælingarmátt.

Um tvö hundruð manns komu saman á Austurvelli í dag og kröfðust afsagnar hina svokölluðu Klaustursþingsmanna. Bára Halldórsdóttir, sem tók upp samtöl þingmannanna á barnum, segir að sér hafi brugðið þegar hluti þeirra mætti aftur til starfa á Alþingi á dögunum. Við litum við á mótmælunum í dag.

Gengið er út frá því að ríkið muni eiga 34 prósenta hlut í Landsbankanum til langframa en það er nákvæmlega jafn stór hlutur og norska ríkið á í DNB bankanum í Noregi. Ein af þeim leiðum sem höfundar hvítbókarinnar leggja til er að ríkið selji eignarhluti sína í Landsbankanum í áföngum eftir skráningu bankans á markað. Við ræðum við Bjarna Benediktsson, fjármálaráðherra, um bankakerfið.

Þá fylgjumst við með þegar átta bandarísk systkini voru skírð í Hallgrímskirkju í dag. Sóknarprestur segir það færast í aukana að erlendir ferðamenn leiti til kirkjunnar vegna ýmissa athafna, allt frá skírnum að brúðkaupum.

Þetta og margt fleira í kvöldfréttum Stöðvar 2 klukkan hálf sjö.