Einn helsti ráðgjafi Trump vill ekki sjá fleiri flóttamenn

Fyrrverandi starfsmaður Hvíta hússins fullyrðir að Stephen Miller, ræðuhöfundur og einn helsti ráðgjafi Donalds Trump Bandaríkjaforseta, hafi lýst því yfir að hann vildi að flóttamenn stigu aldrei framar fæti á bandaríska jörð. Þetta er á meðal þess kemur fram í bók sem starfsmaðurinn hefur skrifað.

Miller er af mörgum talinn aðalhugmyndafræðingur ríkisstjórnar Trump þegar kemur að útlendingamálum og landamærunum, þar á meðal ferðabannsins sem Hvíta húsið reyndi að koma á strax á fyrstu dögum forsetatíðar Trump. Honum er lýst sem harðlínumanni sem vill ekki aðeins draga úr ólöglegum komum fólks til Bandaríkjanna heldur einnig takmarka verulega löglegan innflutning fólks.

Í „Nöðruliðinu“, nýrri bók Cliffs Sims, fyrrverandi starfsmanns samskiptasviðs Hvíta hússins, segir að Miller hafi leikið tveimur skjöldum í Hvíta húsinu. Í fyrstu hafi hann haldið tryggð við Steve Bannon, fyrrverandi aðalráðgjafa Trump, en síðar stungið hann í bakið og gerst náinn Jared Kushner, tengdasyni Trump og einum helsta ráðgafa forsetans.

Sims, sem var tiltölulega lágt settur en naut óvenjulega mikils aðgengis að forsetanum, segist hafa haft áhyggjur af skeytingarleysi Trump í garð flóttafólks, ekki síst ofsóttra kristinna manna erlendis. Hann hafi leitað til Miller með þær áhyggjur en fengið litla hughreystingu hjá honum.

„Ég væri hamingjusamur ef ekki einn einasti flóttamaður stigi fæti á bandaríska jörð nokkru sinni aftur,“ hefur Sims eftir Miller í bókinni.

Sims, sem er á fertugsaldri, lét af störfum í Hvíta húsinu síðasta vor. Í viðtali við tímaritið Atlantic segist hann jafnvel íhuga að bjóða sig fram til öldungadeildar Bandaríkjaþings í Alabama á næsta ári.

Hellti sér yfir þingforsetann sem gagnrýndi viðbrögðin við Charlottesville

Í bókinni lýsir Sims fleiri uppákomum sem hann varð vitni að í Hvíta húsinu, þar á meðal stormasömu sambandi Trump við Paul Ryan, þáverandi forseta fulltrúadeildarinnar og einn helsta leiðtoga Repúblikanaflokksins.

Eftir að Ryan gagnrýndi opinberlega viðbrögð forsetans við ofbeldisverkum hvítra þjóðernissinna í Charlottesville í ágúst árið 2017 hringdi Trump bálreiður í þingforsetann og innti hann eftir því hvers vegna hann sýndi forseta sínum ekki hollustu.

„Veistu hvað ég man líka? Ég man eftir að hafa verið í Wisconsin [heimaríki Ryan] og þitt eigið fólk var á baula á þig. Þú varst að drepast þarna úti eins og hundur, Paul. Eins og hundur! Og hvað gerði ég? Ég bjargaði rassgatinu á þér,“ á forsetinn að hafa sagt við þingforsetann.

Washington Post vitnar í bókina um samskipti Trump og Ryan þegar repúblikanar reyndu hvað þeir gátu að afnema sjúkratryggingalögin sem kennd hafa verið við Barack Obama árið 2017 sýndi Trump Ryan litla athygli þegar þingforsetinn reyndi að kynna honum efni frumvarpsins sem þeir vildu leggja fram.

Sims lýsir því hvernig Trump hafi sötrað á léttkókdós og horft út um gluggann undir kynningunni. Á endanum hafi Trump vafrað út á meðan Ryan var enn að tala og farið að horfa á sjónvarpið í öðru herbergi. Mike Pence varaforseti hafi á endanum þurft að sækja forsetann og sannfæra hann um að halda áfram að undirbúa aðgerðaáætlunina.