Dótturfélag Samherja í eigendahóp Völku

Ice Tech ehf, dótturfélag Samherja, hefur gengið frá kaupum á um 20 prósenta eignarhluta í Völku ehf. af Vortindi ehf.

Í tilkynningu frá Völku segir að með viðskiptunum sé Samherji orðinn einn af stærri hluthöfum Völku ásamt Helga Hjálmarssyni, stofnanda og framkvæmdastjóra Völku, Vogabakka ehf., Vindhamri ehf. og Fossum ehf. Samherij hafi lengi verið í samstarfi við Völku um tækjabúnað í landvinnslur félagsins hér á landi.

Haft er eftir Helga Hjálmarssyni, framkvæmdastjóra Völku, að það sé afar ánægjulegt að fá sterkan bakhjarl á borð við Samherja inn í eigendahóp Völku. „Við höfum unnið farsællega saman að tækniþróun í landvinnslu Útgerðarfélags Akureyrar undanfarin ár og gerðum nýverið stóran samning um aðkomu að búnaði í nýrri landvinnslu Samherja á Dalvík.“

Þá er haft eftir Eiríki S. Jóhannssyni, stjórnarformanni Samherja og Ice Tech, að félagið sé spennt að taka þátt í frekari þróun innan Völku. „Samherji er þátttakandi í þessari grein í gegnum önnur félög eins og til dæmis Slippinn á Akureyri og Kælismiðjuna Frost.  Lausnir Völku hafa reynst mjög vel í sjávarútvegi hér á landi. Ég hef trú á að Valka geti gert sig enn meira gildandi á hinum alþjóðlega markaði og er fjárfestingin hugsuð til að styðja frekar við bakið á útflutningi á íslensku hug- og verkviti og það hyggjumst við gera áfram innan vébanda Ice Tech.”

Valka var stofnað árið 2003 og sérhæfir sig í hátæknilausnum í sjávarútvegi og hefur meðal annars verið leiðandi í þróun á vatnsskurðarvélum.