Bragðbomburnar á Kopar kalla fram minningar

„Síðustu dagar jólavertíðarinnar eru alltaf skemmtilegir. Þá koma yfirleitt smærri hópar, fjölskyldur og vinahópar og fyrir okkur, sem fáum mikið af ferðamönnum á veitingastaðinn, er sérstaklega skemmtilegt að fá umsagnir frá  Íslendingunum.  Þeir koma á öðrum forsendum en erlendir gestir,“ segir Ylfa Helgadóttir, eigandi og yfirkokkur á veitingastaðnum Kopar.

Hún segir ákveðinn línudans að höfða til beggja hópa en galdurinn sé að vera trú eigin gildum.

„Við reynum að falla ekki í þá gildru að eltast við það sem ferðamaðurinn vill heldur lögum matseðilinn að því sem okkur þykir gott og Kopar hefur verið kyndilberi íslensks hráefnis frá opnun, fyrir fimm og hálfu ári síðan,“ segir Ylfa.

„Við leggjum líka sérstaka áherslu á að nota vöðva og parta sem ekki er algengt að sjá á matseðlum eins og gellur, nautakinnar og nautabrjóst. Sjaldgæfir vöðvar kalla á sérstaka matreiðslu og hjá okkur starfar fyrsta flokks fagfólk á öllum sviðum. Allt hráefnið er nýtt og ferskt. Við nostrum við hvert smáatriði til að ná fram því besta og leggjum mikla vinnu í að fullkomna matreiðsluaðferðirnar. Við hættum ekki fyrr en við erum ánægð. Við viljum að fólk segir eftir að hafa borðað fisk hjá okkur: „Þetta er besti fiskur sem ég hef smakkað!“

Hefðbundnir jólaréttir í óhefðbundinni útfærslu

„Kopar er A la carte staður og við erum ekki með hefðbundin jólahlaðborð. Við útbúum hlaðborð beint á borð gesta. Þannig þarf fólk ekki að standa í röð og losnar líka við valkvíðann því við ákveðum réttina.  Við útbúum nýjan matseðil á hverjum ári svo fólk getur komið ár eftir ár og alltaf prófað eitthvað nýtt og spennandi,“ útskýrir Ylfa og segir vel þekktan jólamat á borðum sem lokki fram ljúfar minningar liðinna jóla en komi samt á óvart.

„Þetta eru hefðbundnir jólaréttir í óhefðbundinni útfærslu. Við skerum til dæmis þunnar sneiðar af tvíreyktu hangikjöti og leggjum á lítinn hring af laufabrauði sem við steikjum sjálf, svo er kúmenmæjó í stað uppstúfs og grænu baunirnar myljum við yfir. Þetta er auðvitað allt öðruvísi en fólk fær heima en vekur samt upp minningar. Fólk á svo margar matartengdar minningar, sérstaklega frá jólum og þessar litlu bragðsprengjur kalla þær fram,“ segir Ylfa. Þá eru kokkarnir á Kopar óhræddir við að fá fólk til að smakka.

„Einn glænýr hjá okkur er sérstaklega vinsæll, rauðspretta með roðinu á. Íslendingar virðast nefnilega alltaf hálf hræddir við roð en þegar fiskurinn er svona ferskur gefur roðið mjög skemmtilegt bragð. Við djúpsteikjum rauðsprettuna upp á breskan máta. Bretarnir halda roðinu á og djúpsteikja í orly deigi og hella maltediki yfir fiskinn. En við það vill stökk áferðin á deiginu hverfa.  Við brugðum því á það ráð að steypa edikið í gel og leggjum það yfir fiskinn. Þannig er edikið hluti af  hverjum bita án þess að eyðileggja áferðina á stökku deiginu. Þetta hefur alveg slegið í gegn!“

Fyrirliði landsliðsins í eldhúsi Kopars

Ylfa hefur verið í íslenska kokkalandsliðinu í sex ár og var fyrirliði þess og þjálfari nú þegar liðið hlaut gullverðlaun á heimsmeistaramótinu í matreiðslu í nóvember.  Það hljóta að vera meðmæli með Kopar eða hvað?

„Það er pínu skemmtilegt að hafa verið í landsliðinu allan tímann sem ég hef unnið á Kopar. Það var frábært hvað gekk vel á heimsmeistaramótinu, við náðum 90 stigum og hlutum gull. Það er erfitt því það dugir ekki að vera með 89.99. Fyrir tveimur árum munaði ótrúlega litlu að við næðum því og því var rosalega ljúft að ná gullinu núna.“

Girnilegur jólamatseðill

Vegan jólaævintýri Kopars

Þessi kynning er unnin í samstarfi við veitingastaðinn Kopar.