Nefnd um öryggi í skólum vill vopna kennara

Nefnd sem Donald Trump, forseti Bandaríkjanna, stofnaði í kjölfar skotárásarinnar í Marjory Stoneman Douglas skólanum í Flórída hefur lagt til að kennarar verði þjálfaðir og beri vopn. Nefndin leggur einnig til að lágmarksaldur til byssukaupa verði ekki hækkaður og tillögur sem lagðar voru fram í forsetatíð Barack Obama, sem ætlað var að vernda nemendur sem tilheyra minnihlutahópum, verði felldar niður. Nefndin fjallaði þar að auki um geðræn vandamál, ofbeldi í tölvuleikjum og kvikmyndum og fjölmiðla en fjallaði ekkert um byssulöggjöf í Bandaríkjunum.

Umrædd nefnd var leidd af Betsy DeVos, menntamálaráðherra Bandaríkjanna, og var skýrsla hennar opinberuð í dag. Skýrslan er 177 blaðsíður og er henni ætlað að fjalla um öryggi í skólum með heildrænum hætti.



Samtök skólastjóra í Bandaríkjunum sendu frá sér tilkynningu vegna skýrslunnar og segja undarlegt að nefndin hafi varið sjö mánuðum í að enduruppgötva gamlar tillögur og stefnur án þess að skoða byssueign með nokkrum hætti.

„Byssur í höndum rangra aðila er samnefnari í skólaárásum,“ sagði í yfirlýsingunni. Þá sagði enn fremur að það að nefndin hafi ekki fjallað um þá staðreynd og ekki lagt neitt til í þeim efnum væri vísvitandi. Þannig fórnaði nefndin eigin trúverðugleika.



Samtökin gagnrýna einnig þá tillögu að láta kennara bera vopn hafi þegar verið alfarið hafnað af kennurum, foreldrum og nemendum.

Segja tillögur sem fáir fóru eftir ógna öryggi

Eins og áður segir er helsta uppástunga nefndarinnar að tillögur frá forsetatíð Obama verði felldar niður. Þeim var meðal annars ætlað að koma í veg fyrir að þeldökkum nemendum sé ekki refsað um of en skólum var ekki skylt að fylgja þeim.

Nefndin segir þessar tillögur gera skóla hættulegri því þær komi í veg fyrir að hættulegum nemendum sé refsað eða þeir reknir úr skólum. Eins og bent er á í New York Times hefur þó enginn þeldökkur nemandi framið mannskæða skotárás í skóla á undanförnum árum.



Tillögur þessar voru upprunalega lagðar fram árið 2014 eftir að rannsóknir sýndu að nemendur sem tilheyra minnihlutahópum þurftu oftar að sæta refsingum fyrir sömu brot og hvítir nemendur.

Washington Post segir að rannsókn hafi sýnt að einungis 16 prósent skóla í Bandaríkjunum hafi breytt reglum sínum í samræmi við tillögurnar og nærri því helmingur forsvarsmanna þeirra skóla segir afleiðingarnar hafa verið jákvæðar. Einungis fjögur prósent sögð afleiðingarnar hafa verið neikvæðar.



Nefndin leggur einnig til að kennarar og aðrir starfsmenn skóla verði þjálfaðir í vopnaburði og látnir bera vopn. Í skýrslunni segir að það að hafa slíkt starfsfólk sé góð leið til að koma í veg fyrir og stöðva árásir.

Vert er að benda á lögregluþjónn var að störfum í Marjory Stoneman Douglas skólanum en honum tókst ekki að koma í veg fyrir að Nikolas Cruz myrti sautján nemendur og kennara.

Sjá einnig: Sýslumannsfulltrúi stóð hjá á meðan blóðbaðið fór fram



Þegar kemur geðrænum vandamálum leggur nefndin ekki til nein tiltekin stefnumál eða auknar fjárveitingar. Þess í stað lagði hún til að löggæslustofnanir vinni betur að því að bera kennsl á hættulega aðila.

Komu nánast ekkert að byssueign

Nánast það eina sem nefndin segir um byssueign er að ríki taki upp tiltekin lög sem geri fólki, sem talið er að ógn stafi af, erfiðara að kaupa skotvopn en á sama tíma sagði nefndin að einhver ríki hefðu tekið of stór skref í þá átt.

Nefndin leggur einnig til að fjölmiðlar og aðrir hætti að fjalla um árásarmenn og segir að umfjöllun um skotárásir ýfi upp sár fórnarlamba og auki líkurnar á fleiri árásum. Að hluta til séu árásarmenn að sækjast eftir frægð og að reyna að líkja eftir öðrum.

Aðgengi ungmenna að ofbeldisfullu afþreyingarefni er sérstakt áhyggjuefni, samkvæmt nefndinni. Slíkt efni megi finna í sjónvarpi, tölvuleikjum, á samfélagsmiðlum, í tónlist, kvikmyndum, bókum og teiknimyndabókum. Sem dæmi nefnir nefndin að Cruz hafi spilað ofbeldisfulla tölvuleiki.

„Einhverjir fræðimenn halda því fram að borð sem neyti mikils ofbeldisfulls afþreyingarefnis séu líklegri til félagslegrar einangrunar og ofbeldisfullar hegðunar,“ segir í skýrslunni.

Þetta er þó gömul og umdeild skoðun. Það er satt að vísindamenn hafa komist að þeirri niðurstöðu en vísindamenn hafa einnig komist að andstæðri niðurstöðu. Að engin orsakatengsl séu á milli þess að spila ofbeldisfulla tölvuleiki og ofbeldis.

Nefndin leggur til að aldurstakmarkanir á tölvuleikjum og öðru efni verði endurskoðaðar og að foreldrar noti stillingar á leikjatölvum og öðrum tækjum til að koma í veg fyrir að börn spili ofbeldisfulla tölvuleiki.