Sagðist óttast að það kæmist upp um hann og hann yrði handtekinn

Thomas Møller Olsen var í samskiptum við þáverandi unnustu sína dagana 13. til 18. janúar 2017, áður en hann var handtekinn af lögreglu fyrir að hafa orðið Birnu Brjánsdóttur að bana. Landsréttur staðfesti í dag 19 ára fangelsisdóm yfir Thomasi.

Í dómi Landsréttar kemur fram að í málinu liggi fyrir þýðing á SMS-samskiptum Thomasar við þáverandi unnustu sína.

Þar segir að samskipti þeirra þann 17. janúar lýsi slæmri andlegri líðan Thomasar. Í framhaldi af því að unnustan hafi upplýst Thomas um að einhverjir skipverjanna hefðu tekið á leigu rauða bifreið og að skór Birnu hefðu fundist við Hafnarfjarðarhöfn sendi Thomas henni meðal annars skilaboðin:

„Það er eins og ég muni aldrei fara heim.“

Þegar unnustan spurði Thomas hvað væri það versta sem gæti gerst svaraði hann:

„Veit ekki, að þetta fattist. Verð handtekinn.“

Í samtali þeirra þann 18. janúar, eftir að skipinu hafði verið snúið við til Íslands svaraði Thomas spurningu unnustunnar „ef þið berið sök á hvarfi hennar“ á þá leið:

„Hættu nú. Ég man ekki einu sinni hvernig þær litu út“ og síðar „þau höfðu drukkið“ og í kjölfarið „Þær fóru af í hringtorginu.“

Í samskiptum þeirra var ekkert minnst á fíkniefni heldur snerust þau eingöngu um hvarf Birnu og hvort og hvernig Thomas tengdist því.

Úlpan umdeilda virtist passleg

Meðal gagna málsins var einnig blá úlpa í stærð Medium. Thomas hefur neitað að eiga úlpuna en segist hafa átt úlpu sömu tegundar í stærðinni XL. Á úlpunni fundust blettir sem rannsókn leiddi í ljós að voru blóðblettir og bentu niðurstöður eindregið til um væri að ræða blóð úr Birnu.

Fyrir aðalmeðferð málsins í Landsrétti mátaði Thomas úlpuna auk þess sem hann samþykkti að láta vigta sig. Auk þess mátaði hann aðra úlpu sömu tegundar og stærðar sem verjandi hans hafði útvegað. Mátunin fór fram þann 18. október síðastliðinn og var tekin upp í bæði hljóði og mynd. Thomas taldi úlpuna of þrönga og hélt hann því fram að hann hefði aldrei keypt sér úlpu í þessari stærð.

Thomas var 94 kíló að þyngd við upphaf rannsóknar málsins. Þann 18. Október var hann 100,65 kíló. Upptaka af mátuninni sýnir að hann átti auðvelt með að renna úlpunni upp og virðist hún hæfilega víð og síð.

Segir í dómi Landsréttar að með teknu tilliti til þess að Thomas hafi bætt á sig tæpum sjö kílóum frá því að rannsókn málsins hófst bendi ekkert til annars en að hún hafi passað honum vel við upphaf rannsóknar.

Þá bendi upptökur úr öryggismyndavél við Hafnarfjarðarhöfn eindregið til þess að hann hafi verið í umræddri úlpu þegar hann gekk um borð í Polar Nanoq um klukkan 11 þann 14. janúar 2017.