„Maður hefur svona á tilfinningunni að ég sé allt í einu orðin aðalleikarinn í House of Cards“

Inga Sæland, formaður Flokks fólksins, segist ekki taka það nærri sér að Bergþór Ólason, þingmaður Miðflokksins hafi kallað hana „húrrandi klikkaða kuntu“ í samtali þingmanna Miðflokksins og þingmanna Flokks fólksins á bar í Reykjavík í síðustu viku. Hún segist jafnframt treysta Karli Gauta Hjaltasyni og Ólafi Ísleifssyni þingmönnum sínum, en segir að málið verði tekið upp á fundi í dag.

Rætt var við Ingu í Morgunútvarpinu á Rás 2 í morgun en þar sagði hún ummæli Bergþórs dæma sig sjálf, en að hún þekkti hann ekki persónulega umfram það að heilsast á göngum Alþingis.

„Ég er svo sem ekkert óvön því að þurfa að berjast fyrir tilverunni, vera lögð í einelti og illa um mig talað og annað slíkt en ég tek þetta ekki nærri mér þó þetta sé eins óviðurkvæmilegt og það getur orðið.“

Viðbrögð Sigmundar Davíðs sorgleg

Inga telur að skoðanir hennar á sjálftöku stjórnmálaflokka geri hana ákaflega óvinsæla, sérstaklega hjá þingmönnum Miðflokksins.

Í umfjöllun Stundarinnar í gær upp úr leynilegri upptöku var haft eftir Karli Gauta að hann og Ólafur Ísleifsson væru sammála um að Inga væri ekki starfi sínu vaxin sem formaður flokksins. Inga segist ekki kannast við það viðhorf.

„Þetta er eitthvað sem við eigum eftir að ræða bara í dag, bæði kemur saman stjórn flokksins og aðrir. Auðvitað þurfum við að taka a þessu máli. Auðvitað gerum við það. Þetta er grafalvarlegt eins og þú segir en ég er seinþreytt til vandræða og er það einnig nú. Ég geri mér grein fyrir því að þetta er líka eins og þú sérð að vera með upptökur þar sem menn eru að sitja að sumbli og setja það svona fram þetta er náttúrulega sorglegt og enn þá sorglegra í rauninni viðbrögð formanns Miðflokksins sem enn og aftur kemur fram með sínar samsæriskenningar og firrir sig allri ábyrgð eins og venjulega. Hvort sem hann flytur hér bunka í skattaskjól af peningum eða kemur hér fram með eitthvað slíkt, það er öðrum að kenna,“ segir Inga og vísar þar í ummæli Sigmundar Davíðs Gunnlaugssonar. Hann gaf frá sér yfirlýsingu í gærkvöldi þar sem hann sagðist telja að brotist hefði verið inn í síma eða hlerunarbúnaði beitt.

Bergþór Ólason, þingmaður Miðflokksins, hafði alvarlegustu ummælin uppi um Ingu á upptökunni sem er til umfjöllunar. Hann hringdi í Ingu í gær og bað hana afsökunar. Inga segist taka hana til greina.

„En þegar hann hringir og er virkilega miður sín þá náttúrulega, auðvitað geri ég það. Auðvitað axla ég ábyrgð og er ekki að stökkva út undan mér og vera með einhverja smákrakkatakta útaf svona löguðu. Ég á mjög erfitt með að ganga inn í þetta slæma greinlega siðferði sem þarna býr að baki. Ég get það ekki en ég sagði bara að sjálfsögðu, svo framarlega sem hann meinti það sem hann væri að segja.“

Inga segist líta á flokk sinn sem fjölskyldu og segist sannfærð um að þingflokkurinn taki höndum saman og takist á við þetta mál. Hún segir jafnframt ánægjulegt ef Miðflokknum lítist svo vel á þingflokksformann hennar að þeir vilji bjóða honum sæti í röðum þeirra, en á upptökunni er Ólafi boðið að verða þingflokksformaður Miðflokksins.

Aðspurð hvort að hlutirnir gangi alltaf svona fyrir sig í þinginu segist Inga ekki hafa orðið vör við það.

„Maður er að læra hvernig þetta er allt saman innan þessa blessuðu veggja. En jú maður hefur svona á tilfinningunni að ég sé allt í einu orðin aðalleikarinn í House of Cards en það er nú kannski svolítið skrítið. Það var nú ekki meiningin þegar ég lagði í þessa vegferð. En þetta hefur engin áhrif á mig þannig lagað séð.“

Miðflokkurinn megi éta það sem úti frýs

Inga er engu að síður hörð í garð Miðflokksins, þó hún sé búin að fyrirgefa ummælin, og þá sérstaklega vegna ummæla um að flokkarnir eigi vel saman og ýjað sé að því að þeir ættu að fara í samstarf á einhvern hátt.

„Ég get alveg sagt það aftur að þeir mega éta mín vegna það sem úti frýs. Við erum ekki að fara í eina sæng með Miðflokknum að einu eða neinu leyti. Þeir eru náttúrulega bara stjórnarandstöðuflokkur eins og við og það er náttúrulega bara þannig að það virðist vera mismunandi óvægið hvernig menn reyna að slá sig til riddara og kaupa sér atkvæði,“ segir hún.

„Ef ég hefði einhvern áhuga á Miðflokknum þá væri ég ekki í Flokki fólksins.“

Athygli vekur að á upptökunni virðast Karl Gauti og Ólafur þó ekki taka upp hanskann fyrir Ingu þegar aðrir þingmenn hallmæla henni í umræðunum.

„Maður les það í það að kannski finnst honum þetta lítils virði og ekki skipta máli og þeir megi láta sér finnast það sem þeim finnist og vilja ekki taka þátt í umræðunni, eða bara þögn í þessu tilviki sé sama og samþykki. Þetta er ég ekki búin að fá að vita og fæ vonandi og væntanlega að vita í dag.“

Algjörlega óviðeigandi að þingmenn stígi svona fram

Sigmar Guðmundsson, einn þáttarstjórnanda Morgunútvarpsins spurði Ingu hvort ekki væri erfitt að trúa Karli Gauta eftir einungis eitt símtal og spurði hvort traust væri svo auðveldlega endurheimt eftir svona uppákomu.

„Ég hef aldrei kynnst Gauta öðruvísi en bara einlægum í því sem hann er að gera og segja. Ef Karl Gauti biður mig fyrirgefningar og sýnir að hann meini það þá trúi ég honum. En við skulum bíða og sjá til hvernig þessi dagur fer,“ segir hún.

„Þetta eru jú kjörnir fulltrúar, þetta er löggjafarvaldið. Það er dálítið sorglegt ef það situr að sumbli á bar þegar við erum að vinna þingstörfin inni í þingi. Það segir sína sögu sem ég kæri mig eiginlega ekkert um að tjá mig um,“ segir Inga en bætir við að hún vilji með þessu ekki ýja að því að umræddir þingmenn hafi átt að vera í þinginu á þessum tímapunkti.

Að lokum sagði Inga að þarna séu höfð uppi ummæli um fleiri konur en hana eina og nefnir ummæli um Oddnýju Harðardóttur sem dæmi.

„Mér finnst það algjörlega óviðeigandi að þessir menn skuli stíga svona fram og segir meira um þá en maður jafnvel kærir sig um að vita.“

Inga Sæland mætti svo í Bítið á Bylgjunni í morgun og fór yfir málið.