„Haustið er svo sannarlega komið“

Snjóþekja var á fjallvegum á norðanverðu landinu nú í morgunsárið, til dæmis á Steingrímsfjarðarheiði, Þverárfjalli, Vatnsskarði og Öxnadalsheiði, að því er fram kemur í hugleiðingum veðurfræðings á vef Veðurstofu Íslands. Þá verður köld og hvöss norðanátt áfram ríkjandi í dag og á morgun.

Norðanáttinni fylgir talsverð úrkoma á Norður og Austurlandi, yfirleitt rigningu við sjóinn, en lengst af slyddu eða snjókomu ofan 100-200 metra hæðarlínu. Veðurfræðingur tekur þó fram að hæðarmörk rigningar og snjókomu verða breytileg í dag og á morgun. Þurrviðri er hins vegar í kortunum á sunnanverðu landinu.

Á föstudagskvöld fer styrkur norðanáttarinnar að dvína og úrkoman að minnka og útlit er fyrir rólegt en frekar kalt veður um helgina. Eftir helgi er útlit fyrir að hann snúist í sunnanátt með rigningu sunnan- og vestanlands og á sama tíma hlýnar fyrir norðan og austan. 

„Af ofantöldum veðurlýsingum má vera ljóst að haustið er svo sannarlega komið,“ segir í hugleiðingum veðurfræðings.

Þá er gul viðvörun í gildi á Vestfjörðum, Ströndum og Norðurlandi vestra, Norðurlandi eystra, Austurlandi að Glettingi og Miðhálendi.

Veðurhorfur á landinu næstu daga:

Á föstudag:

Norðan 13-18 m/s, en 18-23 í vindstrengjum suðaustanlands. Talsverð úrkoma á Norður- og Austurlandi, rigning við sjávarmál, en slydda eða snjókoma ofan 200-300 metra hæðarlínu. Þurrt á Suður- og Vesturlandi. Fer að draga úr vindi og úrkomu um kvöldið. Hiti frá 1 stigi í innsveitum fyrir norðan, upp í 9 stig syðst.

Á laugardag:

Minnkandi norðvestanátt og léttir víða til, en él fram yfir hádegi norðaustan- og austanlands. Hiti 0 til 7 stig, mildast á Suðurlandi.

Á sunnudag:

Hæg vestlæg átt og víða bjart veður, en skýjað og þurrt að kalla með vesturströndinni. Hiti 2 til 7 stig að deginum, en nálægt frostmarki um landið norðaustanvert.

Á mánudag og þriðjudag:

Suðlæg átt með rigningu og súld sunnan- og vestanlands, en þurrt að mestu norðaustantil. Hiti 6 til 13 stig, hlýjast um landið norðaustanvert.

Á miðvikudag:

Útlit fyrir suðvestan- og vestanátt með skúrum, en léttskýjað austanlands. Hiti 3 til 9 stig.