Segir að lesendur muni „sleppa sér“ yfir nýrri sjálfsævisögu

Klámstjarnan og athafnakonan Stormy Daniels, sem kveðst hafa stundað kynlíf með Donald Trump Bandaríkjaforseta árið 2006, hyggur á útgáfu nýrrar sjálfsævisögu.

Daniels tilkynnti um útgáfu bókarinnar á miðvikudag er hún var gestur í spjallþættinum The View sem sýndur er á ABC-sjónvarpsstöðinni. Hún lýsti því yfir að lesendur myndu „algjörlega sleppa sér“ við lestur bókarinnar en í henni hyggst Daniels fjalla um feril sinn, æskuárin í Louisiana og samkomulagið við Trump. Bókin verður titluð Full Disclosure, sem gæti útlagst sem Algjör afhjúpun á íslensku.

Eins og frægt er orðið fékk Daniels greidda 130 þúsund dali frá Michael Cohen, lögmanni Donalds Trump, Bandaríkjaforseta, einum mánuði fyrir forsetakosningarnar árið 2016.

Greiðslan var vegna samkomulags um að hún myndi ekki segja frá því að hafa stundað kynlíf með Trump árið 2006 en fyrr á þessu ári krafði forsetinn Daniels um 20 milljónir Bandaríkjadala fyrir að hafa brotið samkomulagið.

Lögmaðurinn Michael Cohen játaði í ágúst að hafa gerst sekur um umfangsmikil skatt- og fjársvik og brot á kosningalögum vegna greiðslunnar til Daniels. Sama dag viðurkenndi Trump að hafa vitað af greiðslunni en ekki fyrr en búið var að ganga frá samkomulaginu.