Hætti strax að nota gölluð klifurbelti

Íþróttavöruverslunin GG Sport hefur ákveðið að innkalla klifurbelti af gerðinni Appollo frá framleiðandanum Grival. Prófanir leiddu í ljós að beltin geta rifnað við notkun.

Neytendastofa framkvæmdi prófanirnar í samræmi við samevrópskt átaksverkefni um skoðun klifurbúnaðar. Á vef Neytendastofu kemur fram að fyrrnefnd Appolo-klifurbelti hafi verið meðal þeirra sem könnuð voru.

Niðurstöður prófunarinnar leiddu í ljós að hætta var á að beltin gætu rifnað. Þegar niðurstöður voru ljósar ákvað GG Sport að innkalla vöruna strax.

Á vef Neytendastofu segir jafnframt að GG Sport hyggist endurgreiða viðskiptavinum klifurbeltin og er þeim ráðlagt að hafa samband við verslunina.

„Neytendastofa hvetur þá sem eiga Apollo klifurbelti frá Grival að hætta strax notkun þeirra.“