Hitaskil nálgast landið

Hitaskil eru stödd vestur af landinu og munu þau nálgast landið í dag. Þetta kemur fram á vef Veðurstofu Íslands en þar segir að þykkna muni upp með morgninum og er búist við suðaustan átt, átta til fimmtán metrum á sekúndu. Rigningin sem fylgir skilunum heldur sér vestur af landinu í dag, en mikill raki mun fylgja loftinu sem leitar til lands og því líkur á að skúrum sunnan- og vestan til, einkum á Snæfells- og Reykjanesi.

Um austanvert landið verður hægari vindur og léttir til norðaustan- og austanlands með deginum, en síðdegis má búast við lítils háttar rigningu eða súld á Suðausturlandi. Hiti 8 til 13 stig í dag, en allt að 16 stiga hiti norðanlands.

Áframhaldandi suðaustanátt á morgun, víða 10-15 m/s og dálítil væta um sunnanvert landið en hægari norðanlands og léttskýjað.

Veðurhorfur á landinu næstu daga: 

Á föstudag:

Suðaustan 10-18 m/s sunnan- og vestan til, en annars hægari. Skýjað og lítils háttar rigning, en bjartviðri fyrir norðan- og austanlands. Hiti 8 til 18 stig, hlýjast á Norðausturlandi.

Á laugardag:

Suðaustan, 5-13 m/s, hvassast með Suðurströndinni. Rigning sunnan- og vestanlands, en léttskýjað norðaustantil. Hiti víða 9 til 17 stig, hlýjast á Norðurlandi.

Á sunnudag:

Hæg austlæg eða breytileg átt, 3-8 og víða dálítil rigning, en úrkomulítið syðst um kvöldið. Hiti 8 til 13 stig.

Á mánudag og þriðjudag:

Norðvestlæg átt og rigning eða súld um norðanvert landið en skýjað með köflum og stöku skúrir sunnanlands. Hiti 6 til 11 stig.

Á miðvikudag:

Útlit fyrir vestalæga átt og lítilsháttar rigningu norðan- og vestanlands en léttskýjað á Suðausturlandi. Hiti 5 til 12 stig, hlýjast suðaustantil.