Þrjár dætur á meðal sex efstu eftir tvo keppnisdaga

Fimm Íslendingar eru í eldlínunni í keppni fullorðinna á tólftu heimsleikunum í Crossfit sem fram fara í Madison, Wisconsin í Bandaríkjunum um helgina.

Annie Mist Þórisdóttir (3), Katrín Tanja Davíðsdóttir (4) og Ragnheiður Sara Sigmundsdóttir (6) eru á meðal sex efstu eftir tvo keppnisdaga. Seinni þraut gærdagsins var Fibonacci.

Annie Mist stóð sig best í seinni þraut gærdagsins og varð fjórða en Ragnheiður Sara varð sjötta og Katrín Tanja áttunda. Oddrún Eik Gylfadóttir byrjaði rosalega vel en það dugði ekki til þar sem hún náði ekki að klára innan 6 mínútna tímarammans. Oddrún er í 31.sæti.

Björgvin Karl Guðmundsson náði ekki að klára og varð í tólfta sæti en hann er í sjötta sæti í heildarkeppninni eftir fyrstu tvo keppnisdagana.

Vísir fylgist með allri keppninni og er henni lýst beint. Hér má sjá beina lýsingu frá gærdeginum.

Í dag hefst keppni rétt fyrir klukkan 14 og verður áfram fylgst með hér á Vísi.