Mun ræða við Pútín um Sýrland, Úkraínu og bandarísku kosningarnar

Donald Trump Bandaríkjaforseti segir að hann muni ræða um afskipti rússneskra stjórnvalda að bandarísku forsetakosningunum árið 2016 þegar hann fundar með Vladimír Pútín Rússlandsforseta í Helsinki um miðjan júlímánuð. Trump segist einnig ætla að ræða um ástandið í Sýrlandi og Úkraínu.

Fundurinn í Helsinki verður fyrsti leiðtogafundur Trump og Pútín frá því að Trump tók við embætti þó að þeir hafi áður átt óopinbera fundi í tengslum við fjölmenna alþjóðlega leiðtogafundi.

„Við munum ræða um Úkraínu, við munum ræða um Sýrland. Við munum ræða um kosningar. Við viljum ekki að neinn hafi áhrif á framkvæmd kosninga,“ sagði Trump við fjölmiðla í gær.

Í frétt SVT kemur fram að bandarískar öryggisstofnanir hafi áður lýst því yfir í skýrslum að forsetinn rússneski hafi gefið fyrirmæli um að reynt yrði að hafa áhrif á niðurstöðu bandarísku kosningarnar. Þá hefur Robert Mueller, sérstakur saksóknari, rannsakað hvort Rússar hafi verið í samskiptum við teymi Donalds Trump í kosningabaráttunni.

Trump og Pútín hafa þó báðir lýst því yfir að Rússar hafi ekki reynt að hafa áhrif á kosningarnar. Trump segist þó ætla að taka upp málið í Helsinki. „Ég mun ræða við hann um allt.“