Óljóst hvenær fjölskyldur verða sameinaðar

Glundroði hefur ríkt innan ríkisstjórnar Donalds Trump Bandaríkjaforseta eftir að hann skipaði fyrst fyrir um aðskilnað foreldra og barna sem koma ólöglega til landsins og hætti svo við með tilskipun í vikunni. Unnið er að áætlun um að sameina sundraðar fjölskyldur en óvíst er hversu langan tíma það gæti tekið.

Stefnubreyting Trump-stjórnarinnar um að handtaka og ákæra alla sem koma ólöglega til Bandaríkjanna leiddi til þess að á þriðja þúsund barna voru tekin af foreldrum sínum frá því snemma í maí. Í fjölda tilfella eru börnin enn í haldi yfirvalda í Bandaríkjunum þó að foreldrunum hafi þegar verið reknir úr landi.

Aðskilnaður fjölskyldnanna hefur vakið harða gagnrýni og fordæmingu í Bandaríkjunum og víða um heim. Eftir að hafa staðfastlega fullyrt ranglega að hendur sínar væru bundnar í málinu lét Trump loks undan og gaf út forsetatilskipun í vikunni um að hætt skylda að taka börn af foreldrum sínum á landamærum.

Ólíkur skilningur ólíkra stofnana

Síðan þá hafa hinar ýmsu alríkisstofnanir sem koma að málum tekist á um hvað tilskipunin þýðir í raun. Washington Post segir að háttsettir embættismenn hafi fundað í gær til að stilla saman strengi sína og móta áætlun um hvernig hægt verði að sameina fjöskyldur á ný. Ekkert liggi þó fyrir um hversu langan tíma það gæti tekið. Embættismenn segja að um 500 börnum af 2.500 hafi þegar verið skilað til foreldra eða forráðamanna.

Bandaríska blaðið segir að tilskipun Trump hafi verið tjaslað saman í snarhasti eftir að forsetinn krafðist þess að fá hana til undirritunar samdægurs á miðvikudag. Næstu dagar hafi einkennst af glundroða þegar mismunandi stofnanir túlkuðu efni hennar á mismunandi hátt. Hvíta húsið hafi ekki gefið miklar leiðbeiningar um hvað skyldi gera.

Þannig taldi Tolla- og landamæraeftirlitið að tilskipunin þýddi að stofnunin ætti ekki lengur að vísa málum fólks sem kemur ólöglega yfir landamærin til dómsmálaráðuneytisins til ákæru. Dómsmálaráðuneytið taldi hins vegar að tilskipunin gæfi leyfi til að fangelsa börn með foreldrum sínum á meðan mál þeirra væru til meðferðar.

Búa sig undir að vista tugi þúsunda í tjaldbúðum

Á meðan alríkisstjórnin reynir að koma sér saman um hvað hún vill í raun gera berast fréttir af því að verið sé að undirbúa herstöðvar til að taka við allt að tuttugu þúsund innflytjendum sem hafa komið ólöglega yfir landamærin. Heimavarnaráðuneytið hafði áður varað við því að það hefði ekki lengur húsaskjól fyrir allan fjöldann sem hefði verið handtekinn.

Breska ríkisútvarpið BBC segir að áætlanir séu um að setja upp tjaldbúðir þar sem fjölskyldur sem hafa verið handteknar fyrir að koma ólöglega til landsins verða vistaðar. Þar verði hægt að taka á móti fleiri tugum þúsunda manna.

Talsmaður varnarmálaráðuneytisins segir að það hafi ekki verið beðið formlega um að gera slíkar áætlanir en það hafi ákveðið að undirbúa sig ef kallið kæmi. Herinn hefur sagt að hann hafi verið beðinn um að búa sig undir að taka við 20.000 innflytjendabörnum.

Ekkert lát virðist því eiga að verða á harðlínustefnu Trump um að ákæra alla sem koma yfir landamærin að Mexíkó í bráð.

Saka innflytjendur um að skilja að fjölskyldur „varanlega“

Þrátt fyrir að Trump hafi látið undan þrýstingi og skrifað undir skjal um að hætta aðskilnaði fjölskyldna hefur ríkisstjórn hans ekki beðist afsökunar á athæfinu eða svarað spurningum fréttamanna undanfarna daga.

Þannig hélt Hvíta húsið viðburð í gær þar sem það reyndi að snúa út úr hugtakinu um aðskilnað fjölskyldna. Í raun væru það innflytjendur sem hafa komið ólöglega til landsins sem hafðu valdið „varanlegum aðskilnaði“ fjölskyldna með því að drepa bandaríska borgara.

Þangað boðaði Hvíta húsið fjölskyldur fólks sem hefur misst ástvini vegna ofbeldis innflytjenda sem komu ólöglega til Bandaríkjanna. Flest fórnarlömbin höfðu látist í umferðarslysum þar sem innflytjendur komu við sögu.

Trump hefur ítrekað haldið því fram að stórhættulegir „ólöglegir innflytjendur“ streymi hömlulaust yfir suðurlandamærin að Mexíkó og fremji voðaverk í Bandaríkjunum. Í kosningabaráttunni höfðaði hann sterklega til andúðar hluta bandarískra kjósenda á innflytjendum og múslimum með því að hóta banni við komum múslima til Bandaríkjanna og að kalla alla Mexíkóa glæpamenn og nauðgara.

„Þetta eru sögurnar sem demókratar og fólk sem er veikgeðja gagnvart innflytjendum vilja ekki ræða, þeir vilja ekki heyra, þeir vilja ekki sjá, þeir vilja ekki tala um þær,“ sagði forsetinn í Hvíta húsinu.