Slökktu í alelda bíl á Bústaðavegi

Slökkviliðið á höfuðborgarsvæðinu var kallað út í morgun vegna bíls sem var alelda á frárein Bústaðavegar yfir á Kringlumýrarbraut. Bíllinn er líklega gjörónýtur.

Samkvæmt upplýsingum frá slökkviliðinu eru tildrög eldsins óljós en hann var mannlaus þegar slökkviliðið kom að bílnum. Fjöldi vegfarenda varð vitni að brunanum enda morgunumferðin í hámarki um það bil sem eldurinn braust út.

Slökkvistarf gekk greiðlega og beðið er eftir því að bíllinn verði dreginn í burtu.