Tryggt sér fjármögnun upp á ríflega 15 milljarða

Arctic Green Energy, íslenskt félag sem var stofnað til þess að þróa og reka umhverfisvænar jarðhitaveitur í Asíu, hefur samið við kínversku fjárfestingafélögin CITIC Capital og China Everbright og Þróunarbanka Asíu um fjármögnun upp á 150 milljónir dala eða sem jafngildir ríflega 15,1 milljarði króna.

Fjármagnið verður nýtt til þess að fjármagna frekari vöxt félagsins og endurfjármagna eldri skuldir. CITIC Capital, sem hefur verið hluthafi í Arctic Green Energy frá árinu 2015, nýtti sér kauprétt að hlutum að virði 30 milljónir dala í félaginu en China Everbright keypti hluti og skuldabréf útgefið af íslenska félaginu fyrir samtals 70 milljónir dala.

Þá veitti Þróunarbanki Asíu félaginu 50 milljóna dala lán. Haukur Harðarson, stjórnarformaður og stofnandi Arctic Green Energy, verður áfram stærsti einstaki hluthafi félagsins en kínversku fjárfestingafélögin munu fara með minnihluta hlutafjár. Hann segir í tilkynningu á vef félagsins að fjármögnunin sé mikilvægt skref.

China Everbright muni breikka hluthafahóp félagsins og styrkja tengsl þess enn frekar við Kína. Tilkynnt var um það í mars síðstliðnum að félögin Arctic Green Energy og Sinopec Green Energy Geothermal hefðu tryggt sér fjármögnun upp á 250 milljónir dala frá Þróunarbanka Asíu til áframhaldandi vaxtar í Kína, en verkefni félaganna þar snúa að því að draga úr notkun jarðefnaeldsneytis á borð við kol, olíu og gas til húshitunar og loftkælingar. Undir merkjum Sinopec Green Energy munu félögin tvö koma að uppbyggingu eins stærsta jarðhitaverkefnis sögunnar í nýrri risaborg í Kína.