Tillögu um áskorun til Ragnars Þórs vísað frá kennaraþingi

Þingsályktunartillögu þar sem lagt var til að Kennarasamband Íslands myndi skora á Ragnar Þór Pétursson, formann KÍ, um að endurnýja umboð sitt var vísað frá á þingi KÍ nú á sjötta tímanum. Ragnar Þór tók við sem formaður Kennarasambandsins á þinginu í dag.

Greidd voru atkvæði um þingsályktunartillöguna og féllu þau þannig að 94 greiddu atkvæði með því að vísa tillögunni frá, 78 greiddu atkvæði gegn því og sex sátu hjá.

Áskorunin sneri að því að Ragnar tæki ekki við formennsku í KÍ að svo stöddu heldur fengi endurnýjað umboð frá kennurum. Ástæðan eru ásakanir sem komið hafa fram á hendur Ragnari um að hann hafi sýnt Ragnari Þór Marinóssyni, Ragga, klám á heimili þess fyrrnefnda en Raggi bjó þá á Tálknafirði þar sem Ragnar Þór starfaði sem kennari. Ragnar Þór hefur ávallt haldið því fram að ásakanirnar séu rangar.

Hanna Björg Vilhjálmsdóttir, forkona jafnréttisnefndar KÍ, fór fyrir hópi kvenna sem lagði tillöguna fram. Hún segir að það hafi verið opnað fyrir umræður um ályktunina og að stuðningsfólk Ragnars Þórs hefði farið mikinn í ræðustól. Þingfulltrúi hafi svo lagt fram frávísunartillögu og voru greidd atkvæði um það sem fóru eins og áður segir á þann veg að ályktuninni um áskorunina var vísað frá.

Hún segir að það hafi komið sér á óvart að frávísunartillaga skyldi lögð fram.

„Já, ég hélt að þingfulltrúar vildu greiða atkvæði um ályktunina og láta þá stuðning sinn við ástandið eins og það er í ljós með því að greiða atkvæði gegn ályktuninni. En svo ákvað fólk að það vildi ekki taka afstöðu til ályktunarinnar. Ég held að það sé klofningur vegna þessa og í afstöðunni til hans. Þetta er ekki friðvænlegt,“ segir Hanna Björg.

Hún segir að konurnar sem lögðu þingsályktunina séu jafn ósáttar nú sem áður. Þá segist hún vita að það sé hópur kjósenda Ragnars Þórs sem myndu ekki kjósa hann aftur ef gengið yrði aftur til kosninga um formann KÍ.

Fréttin hefur verið uppfærð og fyrirsögn hennar breytt þar sem fyrri fyrirsögn „Áskorun til Ragnars Þórs vísað frá kennaraþingi“ var ekki efnislega rétt.