Stormur í dag og „viðkvæm staða“ í kvöld

Núna með morgninum gengur í suðaustan storm sunnan- og suðvestanlands og segir Veðurstofan að strengir við helstu „hviðufjöllin,“ eins og Eyjafjöll, Kjalarnes, Hafnarfjall og fleiri, geti farið yfir 30 m/s.

Úrkoman með þessu er að mestu slydda eða rigning, en þó ekkert aftakaveður. Þó eru gular viðvaranir í gildi fyrir Faxaflóa og Suðurland í dag og verður þeim ekki aflétt fyrr en um klukkan 6 á þriðjudagsmorgun.

Annars staðar er útlit fyrir heldur hægari vind en þó allhvassan vind víða. Élin halda áfram austast, en um landið norðanvert er að mestu úrkomulítið að sögn Veðurstofunnar.

Stofnunin segir jafnframt að allra vestast sé „nokkuð viðkvæm staða í kvöld“ þar sem mjög skörp skil virðast ætla að koma nálægt landi. Austur af þeim er hvöss suðaustanátt með rigningu, en vestan megin er hæg vestlæg átt og snjókoma. „Þessi mjóu skil gætu mögulega komið inn á Snæfellsnes og/eða Reykjanes og er vert að fylgjast með þróun spáa í dag,“ segir veðurfræðingur Veðurstofunnar.

Það dregur svo úr vindi á morgun og styttir upp vestanlands þegar líður á daginn. Annars eru „litlar breytingar á sjálfu veðrinu,“ eins og veðurfræðingur orðar það.

Veðurhorfur á landinu næstu daga

Á þriðjudag:

Suðaustan 10-18 m/s og slydda eða rigning um landið S- og V-vert, en úrkomulítið N-lands. Heldur hægari austlægari vindur síðdegis og dregur úr úrkomu, einkum V-til. Hiti 1 til 6 stig S- og V-lands, en um og undir frostmarki annars staðar. 

Á miðvikudag:

Austlæg átt 8-15 m/s, hvassast syðst. Skúrir eða él S- og A-lands, en þurrt og bjart annars staðar. Hiti 0 til 6 stig. 

Á fimmtudag:

Hæg austlæg eða breytileg átt, en austan 8-13 syðst. Þurrt og bjart í flestum landshlutum, en stöku skúrir eða slydduél við SA-ströndina. Hiti breytist lítið. 

Á föstudag:

Hæg norðaustlæg átt og dálítil él um landið N- og V-vert, en annars þurrt og bjart. Hiti nálægt frostmarki, en upp í 5 stig S-lands yfir daginn. 

Á laugardag:

Gengur í norðaustanátt með éljum víða um land og kólnar í veðri. 

Á sunnudag:

Útlit fyrir norðaustlæga átt og stöku él syðst í fyrstu, annars úrkomulítið og kalt í veðri.