Joe & the Juice á Íslandi hætta í plastinu

 Átta Joe & the Juice staðir eru á Íslandi þannig að ljóst er að með þessu mun mikið plast sparast.

Í staðinn fyrir plastið verða umhverfisvænni umbúðir notaðar. Daníel Kári Stefánsson, framkvæmdastjóri Joe & the Juice, er spenntur fyrir þessu stóra skrefi.

„Þetta er mjög stórt skref fyrir fyrirtækið. Plast hefur leikið stórt hlutverk í okkar daglega rekstri. Við vorum hluti af vandanum en nú ætlum við að verða hluti af lausninni. Við erum stolt af því að Joe & the Juice staðirnir á Íslandi eru þeir fyrstu í keðjunni sem segja skilið við plast.“

Hann segist jafnframt viss um að viðskiptavinir muni taka þessu fagnandi þar sem fólk sé almennt orðið meðvitað um plastmengun sem stórt vandamál.