Hrafnhildur og Jón endurléku frægt Grease atriði á dansgólfinu

Hrafnhildur Lúthersdóttir og Jón Eyþór Gottskálkson fóru mikinn í dansþættinum Allir geta dansað í beinni útsendingu á sunnudagskvöldið en þau dönsuðu Quick Step með miklum tilþrifum.

Saman dönsuðu þau við lagið You're the one that I want úr kvikmyndinni Grease. Parið fékk samtals 16 stig í einkunn frá dómurunum eftir dansinn og voru dómararnir mjög ánægðir með útkomuna. Hrafnhildur og Jón voru fyrst á sviðið á sunnudagskvöldið.

Allir geta dansað er nýr íslenskur skemmtiþáttur í beinni útsendingu byggður á hinum geysivinsælu þáttum Dancing with the Stars.

Í þáttunum keppa tíu þjóðþekktir Íslendingar í dansi en þeir eru paraðir saman við tíu fagdansara og eitt par stendur uppi sem sigurvegari.

Kynnar í þáttunum eru Sigrún Ósk Kristjánsdóttir og Eva Laufey Kjaran Hermannsdóttir. Dómarar eru Selma Björnsdóttir, Karen Reeve og Jóhann Gunnar Arnarsson. Hér að neðan má sjá dansinn frá Hrafnhildi og Jóni.