Formaður kjörstjórnar segir kjörsókn lofa góðu

Þátttaka í flokksvali Samfylkingarinnar í borginni hefur farið vel af stað, en kosningin stendur til klukkan 19 í kvöld. Formaður kjörstjórnar segir flokksmenn bjartsýna fyrir komandi sveitarstjórnarkosningar og þvertekur fyrir að flokkurinn sé í vörn í borginni.

Kosning hófst á hádegi í gær, en klukkan 11 í morgun höfðu um 1100 flokksmenn tekið þátt. Sigríður Ingibjörg Ingadóttir formaður kjörstjórnar segir kjörsókn lofa góðu.

„Mér sýnist það stefna í að það verði betri þátttaka en síðast enda er keppst um öll sæti nema það fyrsta,“ sagði Sigríður í samtali við fréttastofu fyrr í dag.

Þannig er Dagur B. Eggertsson sitjandi borgarstjóri öruggur í fyrsta sæti á lista. Aftur á móti berjast tveir frambjóðendur um annað sæti, fjórir um þriðja og fjórða sæti hvort um sig, og þrír sækjast eftir 5.-7. sæti. Um árabil hefur verið kosið rafrænt í flokksvalinu, þó einnig sé í boði að kjósa handvirkt.

Flokkurinn ekki í vörn

„Þetta ýtir tvímælalaust undir þátttöku, því fólk þarf bara að nota rafræn skilríki eða íslykil og í dag þegar fólk er alltaf á fleygiferð segir það sig sjálft að þetta auðveldar fólki. Enda erum við öll orðin svo vön því að nota rafrænar lausnir.“

Kosningunni lýkur klukkan 19 í kvöld, en von er á fyrstu tölum um hálftíma síðar. Sigríður þvertekur fyrir að flokkurinn sé í vörn í borginni.

„Ég myndi segja að Samfylkingin sé í sókn því að við erum að fara að uppskera fyrir mjög sterkt kjörtímabil. Við höfum verið þar í forustu og það hefur verið mikil uppbygging í borginni. Það sést líka vel í þessu flokksvali að það er mikið af sterku fólki sem að vill koma og taka þátt í að hafa áhrif á borgina með okkur.“