City Taxi gjaldþrota

Leigubílaþjónustan City Taxi var úrskurðuð gjaldþrota með úrskurði Héraðsdóms Reykjavíkur þann 26. janúar síðastliðinn. Var búið tekið til gjaldþrotaskipta. Var Anton Björn Markússon lögmaður skipaður skiptastjóri í búinu.

City Taxi var stofnað árið 2007 og hefur sinnt leigubílaþjónustu, meðal annars boðið upp á ferðir til og frá Keflavíkurflugvelli.

Ekki náðist í Sigtrygg Arnar Magnússon við vinnslu fréttarinnar. Skráðum farsíma hans á Já.is virðist hafa verið lokað og enginn svarar í símanúmer City Taxi. Þá virðist engin virkni hafa verið á Facebook-síðu City Taxi síðan sumarið 2016.

Rógburður reyndist menntaskólahrekkur

Fyrirtækið komst í fréttirnar í desember 2013 þegar framkvæmdastjórinn Sigtryggur Arnar Magnússon sakaði samkeppnisaðila um að hafa skrifað færslu á Facebook þar sem starfsfólk væri sakað um að stela símum af viðskiptavinum sem greiddu ekki.

Málið var hið undarlegasta en reyndist á endanum vera hrekkur menntaskólastráks.

Færsla birtist á Facebook-síðu menntaskólanemans Brynjólfs Hauks Ingólfssonar. Þar var fullyrt að hann hefði hlaupið út úr leigubíl án þess að borga fyrir farið. Hann hefði aftur á móti verið svo óheppinn að gleyma símanum sínum í bílnum.

Færslan var svo hljóðandi:

„Í gær var ég mjög dónalegur við leigubílstjóra og neitaði að borga fyrir farið og eftir að hafa rifist við hann hótaði hann að fara með mig á lögreglustöðina og ég varð hræddur og ákvað að reyna hlaupa í burtu án þess að borga fyrir farið. Þegar ég hljóp í burtu gleymdi ég símanum mínum í leigubílnum. Nú er þessi leigubílstjóri að kenna mér lexíu með því að skrifa þessa uppfærslu. Þótt ég hafi verið mjög dónalegur og hagað mér eins og fífl er leigubílstjórinn það góður að leyfa mér að fá símann til baka með þeim skilyrðum að ég borgi einungis farið og að ég biðjast afsökunar á Facebook síðu minni. Vinsamlegast hafðu samband City Taxi leigubílastöð í síma 422 2222 þegar þú hefur uppfyllt þessi skilyrði vinur. Vonandi verður þessi uppfærsla til þess að þú hugsir þig tvisvar ef ekki tvisvar um áður en þú ert með dólg og neitar að borga fyrir far án skýringa. Kær kveðja Hallur leigubílstjóri.“

Skildi Facebook eftir opið

Færslan fór sem eldur í sinu um netheima. Sigtryggur, framkvæmdastjóri City Taxi, sagðist í samtali við Vísi telja starfsmenn á Borgarbílastöðinni standa á bak við færsluna. Grunsemdir sínar byggði hann á því að stöðin væri með lénið airport-citytaxi.is sem væri svo líkt léni City Taxi, citytaxi.is.

Á þeim tíma var Sigtryggur að skoða rétt sinn ásamt lögmanni sínum, Sveini Andra Sveinssyni.

„Ég er á leiðinni til Sveins Andra en hann er Facebook snillingur og getur eflaust fundið út hvaðan þessi færsla um leigubílstjórann Hall er komin,“ sagði Sigtryggur. 

Í ljós kom að vinur Brynjólfs, Daníel Aron Lárusson, hafði skrifað færsluna til að hrekkja vin sinn.

„Þetta var allt bara eitthvað grín. Ég skildi Facebook-síðuna mína eftir opna og vinur minn sem leggur mikið upp úr gríni setti þessa færslu inn,“ sagði Brynjólfur Haukur. 

Áttaði sig ekki á hrekknum fyrr en eftir próf

„Við vorum að læra fram eftir og svo fór ég í próf í morgun og sá þetta ekki fyrr en eftir það,“ segir Brynjólfur.

Þá var færslan komin með hátt í 300 „like“ sem þótti mikið á því herrans ári 2013.

„Aldrei hefði mér dottið í hug að þetta myndi vekja svona mikla athygli, segir hann. „Þetta er alveg ruglað.“

„Ég vil ekki lenda í neinu veseni útaf þessu og ég er mjög hissa á því hvernig þetta hefur þróast,“ segir Brynjólfur sem tekur þó fram að honum finnst þetta þrátt fyrir allt vera mjög fyndið.