Eygló verkefnisstjóri nýs húsnæðisúrræðis Kvennaathvarfsins

Eygló Harðardóttir, fyrrverandi félags- og húsnæðismálaráðherra hefur verið ráðinn sem verkefnisstjóri hjá Kvennaathvarfinu. Mun hún veita forystu nýrri húsnæðissjálfseiganstofnun sem Kvennaathvarfið hefur stofnað utan um sextán íbúðir sem ætlunin er að byggja.

„Húsnæðismálin og baráttan gegn ofbeldi eru málaflokkar sem mér hefur verið annt um og verið hjartans mál og er þakklát fyrir að fá að leiða þetta verkefni,” segir Eygló í samtali við fréttastofu.

Eygló segir mikla nauðsyn á húsnæðisúrræði fyrir konur sem leita til Kvennaathvarfsins sem sjáist á lengdum dvalartíma í athvarfinu. Borgin hefur úthlutað athvarfinu lóð miðsvæðis í borginni og talið er að bygging taki eitt og hálft til tvö ár.

„Það hefur verið kallað millistigsúrræði þannig að konur og börn geti búið í íbúðum í þrjú ár í mesta lagi á meðan þær eru að jafna sig eftir ofbeldi í nánu sambandi, ganga frá skilnaði, koma fjármálum og koma sér í jafnvel í nám og vinna úr áfallinu sem tengist ofbeldinu.”

Fjármagnið kemur að hluta til úr söfnun frá Á allra vörum síðasta haust og hafa ýmsir boðið fram aðstoð við að hanna íbúðirnar og innrétta þær.

Lögð er áhersla á að skapa heimili fyrir konur og börn en einnig verður lögð áhersla á að tryggja öryggi kvennanna.

„Þetta er leiguhúsnæði en á hagkvæmu verði en það verður líka þessi stuðningur til viðbótar. Ekki bara leiguíbúðir á góðum stað heldur verður viðbótarstuðningur til að hjálpa fjölskyldunum.“