Björgvin Skúli ráðinn framkvæmdastjóri Kortaþjónustunnar

Björgvin Skúli Sigurðsson, fyrrverandi framkvæmdastjóri markaðs- og viðskiptaþróunarsviðs Landsvirkjunar, hefur verið ráðinn framkvæmdastjóri Kortaþjónustunnar. Þetta var tilkynnt á starfsmannafundi hjá fyrirtækinu síðastliðinn föstudag, samkvæmt heimildum Markaðarins.

Jóhannes Ingi Kolbeinsson, einn af stofnendum Kortaþjónustunnar og framkvæmdastjóri færsluhirðingarfyrirtækisins um árabil, hefur samhliða þessum breytingum látið af störfum hjá félaginu.

Björgvin Skúli starfaði hjá Landsvirkjunum á árunum 2013 til 2017 en þangað fór hann eftir að hafa verið framkvæmdastjóri hjá Deutsche Bank í London. Þar áður vann hann hjá bandaríska fjárfestingabankanum Lehman Brothers um þriggja ára skeið og síðar hjá slitastjórn sama fyrirtækis.

Tveir mánuðir eru síðan fjárfestingabankinn Kvika og hópur einkafjárfesta, meðal annars hjónin Svanhildur Nanna Vigfúsdóttir og Guðmundur Örn Þórðarson, stórir hluthafar í Kviku og VÍS, bræðurnir Ágúst og Lýður Guðmundssynir og Sigurður Bollason keyptu Kortaþjónustuna á aðeins eina krónu. 

Samtímis kaupunum, eins og upplýst var um í Markaðnum í nóvember í fyrra, lagði fjárfestahópurinn félaginu til nærri 1.500 milljónir í nýtt hlutafé en Kortaþjónustan stóð frammi fyrir alvarlegum lausafjárvanda í kjölfar greiðslustöðvunar Monarch í byrjun október. Kortaþjónustan var á meðal átta fyrirtækja sem sáu um færsluhirðingu fyrir flugfélagið. 

Áfallið sem Kortaþjónustan varð fyrir við gjaldþrot Monarch kom á sama tíma og eigendur þess voru langt komnir í viðræðum um sölu á fyrirtækinu til ástralsks fjárfestingasjóðs fyrir um 80 milljónir evra, jafnvirði um tíu milljarða króna. Búið var að ljúka áreiðanleikakönnun vegna fyrirhugaðrar sölu á félaginu. Ekkert varð hins vegar af kaupum sjóðsins þegar ljóst varð að Kortaþjónustan yrði fyrir miklu fjárhagstjóni þegar breska flugfélagið óskaði eftir greiðslustöðvun.  

Korta­þjónustan hafði tekið á sig áhættu með viðskiptunum við Monarch vegna fjármuna sem viðskiptavinir flugfélagsins höfðu greitt fyrir flugferðir sem það gat síðar ekki staðið við. Var fyrirtækið í þeim tilfellum í ábyrgð fyrir greiðslum sem höfðu farið beint til Monarch við kaup á farmiðum. 

Jóhannes Ingi og eiginkona hans, Andrea Kristín Jónsdóttir, voru áður stærstu hluthafar Kortaþjónustunnar en auk þess átti Gunnar M. Gunnarsson, forstöðumaður hugbúnarðarsviðs, hlut í félaginu.