Hækka fjárveitingar til framhalds- og háskóla um 3,8 milljarða

Fjárveitingar til framhalds- og háskóla á landinu munu hækka um 3,8 milljarða króna á næsta ári. Háskólarnir fá 2,8 milljarða og framhaldsskólarnir fá 1.040 milljónir miðað við fjárlagafrumvarp ríkisstjórnarinnar sem kynnt var nú í morgun.

Þetta kemur fram í tilkynningu frá Mennta- og menningarmálaráðuneytinu. Þar segir að fjárveitingunni til háskólanna sé ætlað að efla bæði kennslu og rannsóknir, bæta þjónustu við nemendur, auka vísindastarf og styrkja alþjóðlegt samstarf.



Með auknum fjárveitingum til framhaldsskóla er stuðlað að því að markmiðum um fjármögnun framhaldsskólastigsins verði náð og er fénu ætlað að efla starfsemi skólanna og efla iðn- og verknám.

„Þessi mikla aukning er liður í þeirri stórsókn sem ríkisstjórnin hefur boðað í menntamálum. Við ætlum að standast samanburð við þær þjóðir sem standa sig best og tryggja að nemendur fái bestu mögulegu þjónustu. Skólarnir eru lykilstofnanir í samfélaginu og það er tímabært að uppfylla þarfir þeirra, svo gæði starfsins verði tryggð,” segir Lilja Alfreðsdóttir, menntamálaráðherra, í tilkynningunni.

Þar segir einnig að starfsemi íslenskra háskóla hafi stóraukist á undanförnum árum. Framboð náms hafi verið aukið á öllum stigum náms. Rannsóknarstarfsemi hafi verið aukin og erlent samstarf hafi verið virkt.