Vildi sjá auknar lýðræðisumbætur í stjórnarsáttmála

Halldóra Mogensen, þingmaður Pírata, gagnrýnir ríkisstjórnina fyrir að hafa ekki gefið lýðræðisumbótum nægan gaum í nýjum stjórnarsáttmála.

Þetta sagði Halldóra í þjóðmálaþættinum Víglínunni en hún var gestur þáttarins ásamt Þorgerði Katrínu Gunnarsdóttur, formanni Viðreisnar. Til umfjöllunar var stefnuræða forsætisráðherra og málefni stjórnarandstöðunnar en flokkarnir sem hana mynda skipuleggja nú í óða önn kjörtímabilið.

Í þættinum sagðist Halldóra sakna lýðræðisumbóta og stjórnarskrárinnar mjög í stjórnarsáttmála ríkisstjórnar Vinstri hreyfingarinnar - græns framboðs, Framsóknar og Sjálfstæðisflokks.

„Lýðræðisumbætur og náttúrulega stjórnarskráin, sem píratar hafa lagt mikla áherslu á, tel ég að séu nauðsynlegar fyrir okkur, fyrir framtíðina og fyrir sáttina í landinu að koma því í gagnið og mér sýnist á þessum stjórnarsáttmála að það á bara að setja þetta í enn eina nefndina og það á að lengja þetta ferli. Það er alltaf bara leið til að stoppa það,“ segir Halldóra.

Hún segist þá einnig sakna þess að þjóðin geti kallað eftir þjóðaratkvæðagreiðslu í stórum og umdeildum málum og komið þannig í veg fyrir málþóf. Það ætti að þykja sjálfsagt að þjóðin geti gripið inn í. Aðkoma almennings að ákvarðanatöku og stefnumótun sé nauðsynleg samfélaginu og þá ætti almenningur auk þess að koma fá að því að semja lög.

„Ég hef áhyggjur af því að með því að leiða flokk til valda sem hefur síendurtekið staðið gegn lýðræðisumbótum og verið staðin að því að misnota vald sitt hafi Vinstri hreyfingin - grænt framboð vanmetið hvað er þjóðfélaginu sem heild til heilla til lengri tíma. Og muni algjörlega missa marks þegar kemur að því að byggja upp traust á stjórnmálum og Alþingi og að styrkja lýðræðið á Íslandi,“ sagði Halldóra í umræðu um stefnuræðu forsætisráðherra í fyrradag.

Í myndspilaranum hér að neðan er hægt að hlusta á Víglínuna í heild sinni.