Rannveig Rist segir að lögregla og önnur yfirvöld hafi brugðist þegar hún varð fyrir sýruárásinni

Rannveig Rist, forstjóri Alcan á Íslandi, fékk sýru í andlitið morguninn eftir að skemmdarverk voru unnin á heimili hennar aðfaranótt 5. ágúst árið 2009. Sýrubruninn var það alvarlegur að hún hlaut sár í andlitið en um nóttina höfðu verið unnin skemmdarverk á heimili Rannveigar í Garðabæ. Málningu var skvett á íbúðarhúsið og þegar Rannveig opnaði framdyr fjölskyldubifreiðar um morguninn þann 5. ágúst skvettist sýra úr hurðarfalsinu framan í hana rétt neðan við hægra augað. 

Sjá einnig: Rannveig særð í andliti eftir sýruárás

„Ég opnaði bílinn vegna þess að hann var allur út í einhverju, það var svona eins og lakkið væri að hluta til uppleyst, en það var allt þurrt svo við sáum ekki strax að þetta væri sýra. Ég opnaði bílinn og í hurðarfalsinu var greinilega vatn, þannig að það var vatnsblönduð sýra sem var í falsinu, það komu dropar í andlitið á mér og ég fékk sár af þeim. Ég var heppin að fá þá ekki í augun. En ég fékk sár í andlitið sem ég átti í dálítið lengi, þannig að þetta var býsna alvarleg árás,“ segir Rannveig í samtali við RÚV um árásina. Hún telur að lögregla og önnur yfirvöld hafi brugðist þegar hún varð fyrir sýruárásinni en Rio Tinto telji þetta alvarlegustu árás sem gerð hafi verið á starfsmann þess á Vesturlöndum frá upphafi. 



Börnin heima þegar árásin átti sér stað

Stefán Eiríksson, lögreglustjóri á höfuðborgarsvæðinu, sagði í samtali við Vísi eftir atvikið árið 2009 að málið væri litið mjög alvarlegum augum og hafi verið tekið föstum tökum. Hann vildi hins vegar ekkert tjá sig frekar um rannsóknina. Á þessum tíma hafði lögreglan til rannsóknar á annan tug mála þar sem skemmdarverk höfðu verið unnin á heimilum fólks úr fjármála- og orkugeiranum. Rannveig kærði árásina en málið var látið niður falla. Hún kærði þann úrskurð en það var líka látið niður falla. 

Rannveig segir að fjölskyldan hafi verið í sumarfríi þegar skemmdarverkin og árásin áttu sér stað og voru börnin hennar tvö á heimilinu, það yngra átta ára. Rannveig segir að málið hafi fengið mjög á fjölskylduna en búið var að mála veggina um nóttina þar sem börnin sváfu og utan á húsið var málað: „Hér býr illvirki.“



Almennur ótti í þjóðfélaginu

Hún furðar sig á því að enginn hafi mótmælt því að slíkar árásir hafi verið gerðar hér á landi en sýru var einnig beitt þegar skemmdarverk voru unnin á heimili Hjörleifs Kvaran, forstjóra Orkuveitu Reykjavíkur.  Það hafi svo verið stór samkoma á Íslandi nokkrum árum síðar þar sem var verið að mótmæla sýruárásum í fjarlægum löndum. 



„Mér finnst raunverulega bara almennt í þjóðfélaginu að það stóð enginn upp gegn þessu, þeim tókst þessum aðilum sem voru þarna að verki í þessum hömlulausu aðgerðum að hræða ansi marga. Þannig að lögreglan og alþingismenn og þeir sem hefðu átt að bregðast við og standa upp við svona þorðu því ekki af ótta við að lenda í svona sjálfir. Mér fannst vera almennur ótti í þjóðfélaginu og menn lögðu ekki í málið. Vegna þess að það er mjög skrýtið að svona árás skuli ekki vera tekin mjög föstum tökum og alvarlega."

Rannveig segir við RÚV að hún fagni #MeToo umræðunni sem núna er í gangi og segir hana þarfa og tímabæra. „Ég held að það sé ágætt að menn átti sig á því að það er alveg kominn tími á að konur séu meðhöndlaðar með sama hætti og karlmenn. Ég ætla ekki að óska körlunum að þeir séu meðhöndlaðir með sama hætti og konur."