Varasamar aðstæður á Austfjörðum

Veðurstofan varar við mjög snörpum vindhviðum á sunnanverðum Austfjörðum framan af morgni. Þar má gera ráð fyrir norðan og norðvestan 15 til 23 m/s og hviðum sem geta náð 40 m/s.

Þá mun ganga á með éljum á svæðinu og jafnframt eru líkur á skafrenningi. Því ættu ökumenn að hafa varann á enda verða akstursaðstæður á Austfjörðum varasamar, sérstaklega á fjallvegum.

Annars verður víða norðlæg átt á landinu í dag með él og dálítilli snjókomu eystra en annars léttskýjað. Búist er við því að það muni lægja og birta til eftir hádegi en að áfram verði 8 til 15 m/s fyrir austan og dálítíl él við ströndina. Veðrið verði jafnframt svipað á morgun.

Frost verður á bilinu 1 til 12 stig og kaldast inn til landsins.

Veðurhorfur á landinu næstu daga

Á laugardag:

Norðaustlæg eða breytileg átt, víða 3-8 m/s, en norðvestan 8-13 m/s A-ast. Skýjað með köflum N- og A-til og stöku él, en annars bjartviðri. Frost 1 til 10 stig, mest í innsveitum. 

Á sunnudag:

Norðvestan 10-15 m/s og él NA-til, en annars hægari norðanátt og léttskýjað. Áfram kalt í veðri. 

Á mánudag:

Norðankaldi og dálítil él við A-ströndina, en annars hægir vindar, bjartviðri og talsvert frost. Vaxandi suðaustanátt og þykknar upp SV-lands um kvöldið og dregur úr frosti. 

Á þriðjudag:

Ákveðin suðaustan- og austanátt með snjókomu og síðan slyddu, en þurrviðri á N- og A-landi. Hiti nálægt frostmarki við sjávarsíðuna, en frost að 10 stigum í innsveitum. 

Á miðvikudag og fimmtudag:

Útlit fyrir norðaustlæga átt með éljum víða um land, en yfirleitt bjartviðri SV-til. Frost um allt land.