Hafa safnað 50.000 undirskriftum á fyrstu fimm dögum herferðarinnar

Íslandsdeild Amnesty International hefur safnað 50.000 undirskriftum á fyrstu fimm dögum herferðarinnar Bréf til bjargar lífi. Herferðin stendur yfir í 16 daga og fer hún virkilega vel af stað. Undirskriftunum er safnað í gegnum vefsíðu Íslandsdeildar Amnesty International.

50.000 undirskriftum verið safnað á landsvísu þar sem almenningur er beðin um að lýsa upp myrkrið með því að ljá undirskrift sína á tíu áríðandi mál einstaklinga og hópa sem sæta mannréttindabrotum. Þúsundir hafa lagt leið sína að Hallgrímskirkju þar sem ljósainnsetningin Lýstu upp myrkrið hefur farið fram, en Serious Business gerði kirkjuna af risastóru kerti um helgina. Telur Íslandsdeild Amnesty að vitundarvakning hafi orðið hér á landi um herferð samtakanna í þágu þolenda mannréttindabrota.

„Fimm daga gagnvirk ljósainnsetning við Hallgrímskirkju var hápunktur herferðarinnar Bréf til bjargar lífi þar sem rúmlega 11.000 undirskriftum var safnað til að þrýsta á stjórnvöld í tíu ríkjum að láta af mannréttindabrotum. Ljósainnsetningin var sýnileg vítt og breitt um Reykjavík og dró að sér gesti og gangandi sem ljáðu undirskrift sína til að halda loganum lifandi bæði með táknrænum hætti á kerti kirkjunnar og í reynd í lífi þeirra sem beittir eru skelfilegum órétti.“

Enn eru átta dagar eftir af herferðinni svo henni er hvergi nærri lokið. Bréf til bjargar lífi er stærsti mannréttindaviðburður heims sem fer fram í rúmlega 150 löndum og landssvæðum á aðventunni. Hundruð þúsunda koma þá saman og skrifa milljónir bréfa og korta, eða skrifa undir á vefsíðum eða í sms-áköllum og skora á stjórnvöld að gera umbætur í mannréttindamálum. Þessi einstaki samstöðumáttur skilar raunverulegum breytingum í lífi þeirra sem minnst mega sín. Á hverju ári eru samviskufangar leystir úr haldi, fangar hljóta mannúðlegri meðferð, þolendur pyndinga sjá réttlætinu fullnægt, fangar á dauðadeild eru náðaðir eða ómannúðlegri löggjöf er breytt.

Fyrir þolendur brotanna og fjölskyldur þeirra eru bréfin tákn um alþjóðlega samstöðu fólks sem lætur sig varða réttindi þeirra og mannlega reisn. Hér á landi er hægt að skrifa undir undir mál tíu einstaklinga og hópa sem sætt hafa grófum mannréttindabrotum.

Hér að neðan má sjá myndband sem Serious Busines Agency gerði fyrir Amnesty á meðan á ljósainnsetningunni stóð: