„Það var ekki gert í neinu fússi“

„Sumt gefur augaleið,“ sagði Jón Gunnarsson í Reykjavík síðdegis þar sem hann var spurður hvort hann væri ósáttur við að hafa ekki fengið embætti samgönguráðherra í nýrri ríkisstjórn Vinstri grænna, Sjálfstæðisflokks og Framsóknarflokks.

Jón gegndi því ráðherraembætti í fráfarandi ríkisstjórn Sjálfstæðisflokks, Bjartrar framtíðar og Viðreisnar.

Fregnir bárust af því fyrr í dag að Jón hefði gengið ósáttur út af þingflokksfundi Sjálfstæðisflokksins fyrr í dag, allt að því í fússi, en Jón sagði í Reykjavík síðdegis það ekki rétt.

„Það var ekki gert í neinu fússi,“ sagði Jón sem tók fram að hann hefði átt ágætis samræður við sína flokksfélaga og allt rætt í mesta bróðerni. Hann hafi síðan beðið þá um að afsaka það að hann færi af fundi því hann hafi viljað heilsa upp á fjölskyldu sína til að fara yfir stöðuna með henni.

Þakklæti efst í huga

Hann sagðist þakklátur starfsfólki samgönguráðuneytisins sem hann fékk að stýra. Einnig sagðist hann þakklátur fyrir það tækifæri sem hann fékk sem ráðherra og þakklátur fyrir þann árangur sem náð var á vettvangi samgöngumála í þá átta mánuði sem hann gegndi því embætti.

„Við vorum með lengstu málaskrá allra ráðuneyta tilbúna fyrir þennan þingvetur,“ sagði Jón.

Hann sagðist hafa fundið fyrir miklum stuðningi innan Sjálfstæðisflokksins vegna starfa sinna og sömuleiðis hefði hann fundið fyrir stuðningi út um allt land vegna starfa hans.

„Ég stend sáttur upp frá borði en hefði vissulega viljað hafa tímann lengri eins og vera ber,“ sagði Jón.

Styður ríkisstjórnina til góðra verka

Hann sagðist ætla að styðja þessa ríkisstjórn til góðra verka og mun taka þátt í þingstörfum.

Jón sagðist engar kröfur gera þegar hann var spurður hvort hann geri kröfu um að verða formaður samgöngunefndar Alþingis.

Hann hafði bara gott að segja um eftirmann sinn, Sigurð Inga Jóhannsson formann Framsóknarflokksins. Þeir hafi náð ágætlega saman og ekki svo fjarlægir í skoðun. Sigurður væri góður maður og fái gott bú í veganesti. „Hann hefur tækifæri þarna til að ljúka mörgum góðum málum sem eru komin vel á leið.“