Innlent

Ákærð fyrir árás á spænska ferðakonu í Hlíðunum

Kolbeinn Tumi Daðason skrifar
Árásin átti sér stað síðsumars í Hlíðunum í Reykjavík.
Árásin átti sér stað síðsumars í Hlíðunum í Reykjavík. vísir/vilhelm
24 ára kona hefur verið ákærð fyrir sérstaklega hættulega líkamsárás og tilraun til ráns í Eskihlíð í Reykjavík í sumar. Konan réðst á rúmlega þrítuga spænska konu sem var stödd hér á landi á ferðalagi. Hótaði hún að skaða hana með hníf ef hún léti ekki farsíma sinn af hendi. Spænska ferðakonan neitaði og við það réðst konan á hana.

 Fjallað var um árásina á Vísi í sumar. Konan, sem var í annarlegu ástandi, skar spænsku konuna í höndina og beit hana svo til blóðs. Í framhaldinu réðst hún á hana og lagði aftur til hennar með hníf.

 Guðmundur Páll Jónsson, lögreglufulltrúi á höfuðborgarsvæðinu, sagði í samtali við Vísi í ágúst að vegfarandi hefði komið spænsku konunni til hjálpar. Saman héldu þau stúlkunni niðri þar til lögreglu bar að garði.

Reif í hár og skar í kinn

 Í ákærunni segir að íslenska konan hafi skellt þeirri spænsku á bakið og bitið í hægra handarbak hennar, skorið í það og rifið í hár hennar. Þá setti hún hníf að hálsi spænsku konunnar, sveiflaði hníf þannig að hún skar hana í andlitið. Hlaut hún bitsár, mar og skrámu á hægra handarbak og skrámu á hægri vanga að því er fram kemur í ákærunni.

 Lögmaður spænsku konunnar fer fram á 1,2 milljónir króna í miskabætur. 

 Hin ákærða kona situr í gæsluvarðhaldi vegna síbrota. Í því felst að óttast er að gangi hún laus haldi hún áfram brotum sínum. Konan er ákærð fyrir nokkur brot til viðbótar á tæplega sjö vikna tímabili í aðdraganda árásarinnar í Eskihlíð.

 Er hún ákærð fyrir vopnalagabrot í júlí fyrir að hafa í Eskihlíð verið með hníf með 19 sm löngu hnífsblaði í fórum sínum á almannafæri. Sömuleiðis fyrir að hafa hótað og ógnað starfsmanni Víðis við Borgartún í ágúst vopnuð hamari, skrúfjárni og hníf. Þá hótaði hún starfsmanni Bónus við Laugaveg í ágúst með hníf.


Tengdar fréttir

Mest lesið


Fleiri fréttir

Sjá meira


×

Mest lesið