Fulltrúar flokkanna þriggja í meirihlutaviðræðum skáluðu í Ráðherrabústaðnum

Aðrir fulltrúar flokkanna þriggja sem eru nú í meirihlutaviðræðum skáluðu í freyðivíni í Ráðherrabústaðnum við Tjarnargötu fyrr í dag. Greint var frá þessu í kvöldfréttum Ríkisútvarpsins sem náði myndum af fulltrúunum með freyðivínsglas í hönd inn um glugga bústaðsins.

Viðræður Sjálfstæðisflokks, Vinstri grænna og Framsóknarflokks hafa staðið yfir í dag og er myndun ríkisstjórn sögð mjög langt komin. Bjarni Benediktsson, formaður Sjálfstæðisflokksins, sagði í viðtali við RÚV að nokkur atriði standi út af sem formenn flokkanna þriggja munu útkljá sín á milli.

Hlutverki annarra fulltrúa flokkanna þriggja sem hafa komið að þessum viðræðum er því lokið. Á meðal annarra fulltrúa flokkanna eru Lilja Alfreðsdóttir hjá Framsóknarflokknum og Svandís Svavarsdóttir hjá Vinstri grænum.

Hallgrímur Indriðason, fréttamaður RÚV, sagði aðra fulltrúa flokkanna hafa viðurkennt að þeir hefðu opnað freyðivínsflösku í ljósi þess að þeirra þætti í þessum viðræðum væri lokið. Hallgrímur sagði flokksleiðtogana ekki hafa tekið þátt í því en hann sagði þessa skál benda til þess að viðræðurnar séu ansi langt komnar.

Í kvöldfréttum Stöðvar 2 kom fram að texti stjórnarsáttmála Sjálfstæðisflokks, Vinstri grænna og Framsóknarflokks færi að verða tilbúinn og að það muni liggja fyrir á morgun hvort ríkisstjórnin verði mynduð eða ekki.

Tæpar tvær vikur eru frá því formlegar viðræður flokkanna þriggja hófust. Spurð hvers vegna viðræðurnar hafa tekið svo langan tíma svaraði Katrín Jakobsdóttir, formaður Vinstri grænna, því í kvöldfréttum Stöðvar 2 að flokkarnir þrír séu eðli málsins samkvæmt ólíkir og samhliða þessum viðræðum hafi þurft að vinna fjárlagatillögur sem verða lagðar fyrir komandi þing.

Sagt var frá því í kvöldfréttum Stöðvar 2 að það sem hefur flækt gerð málefnasamnings flokkanna þriggja er ólík sýn þeirra í umhverfismálum og einnig ólík sýn þeirra á tekjuöflun ríkisins.